Хүний шинэ төрөл зүйл болох “Луу хүн” шинжлэх ухаанд бүртгэгдэв

80 гаруй жилийн өмнө зүүн хойд Хятадын Харбин хотын ойролцоогоос олдсон эртний хүний гавлын ясыг шинжлээд хүний цоо шинэ төрөл зүйл болохыг саяхан тогтоожээ.

Нээлтийн тухай судлаачдын тайлан Баасан гарагт “The Innovation” сэтгүүлд нийтлэгдсэн байна.

Харбинаас олдсон гавлын яс нь 138,000-аас 309,000 жилийн өмнө амьдарч байсан 50 орчим насны эрэгтэй хүнийх байжээ. Гэхдээ энэ нь орчин үеийн хүн буюу Хомосапиенсийн төрөл зүйлээс тусдаа цоо шинэ төрөл зүйл болохыг тогтоосон байна.

Шинэ төрөлд “Homo longi” гэсэн нэрийг өгсөн нь Хэйлунзянь (Heilongjiang) буюу Хар Луу Мөрний нэрнээс үүдэлтэй ажээ. Өөрөөр хэлбэл “Луу хүн” гэсэн утгатай нэр юм.

 

“Харбины хүний гавал бол сүүлийн 50 жилийн хугацаанд миний харсан хамгийн үнэтэй чухал олдвор юм. Хүн төрөлтний түүхэнд Зүүн Ази, Хятад улс ямар чухал болохыг энэ олдвор харууллаа” гэж судалгаанд оролцсон Лондон хотын Байгалийн Түүхийн Музейн хүний гарал судлаачдын ахлагч Крис Стрингер ярьжээ.

“Луу хүн” нь өргөн навтгар хамар, жижиг дух зэрэг мичний төрхийг агуулснаас гадна хүн шиг өргөн, хавтгай шанаатай байсныг тогтоосон байна.

Үүнээс гадна тархины хэмжээ нь орчин үеийн хүнийхтэй ойролцоо, бас гүн ухархайтай хөнхөр нүдтэй байжээ.

Ийнхүү хүн төрөлтний хөгжлийн замын зурагт шинэ салаа мөчир нэмэгдэж байна.

300,000 орчим жилийн өмнө анх Африк тивд амьдарч байсан Хомосапиенсээс гадна 

Неандерталь, Денисовын хүн, одой Хомо флоресиенсис, Хомо лузоненсис, Хомо наледи зэрэг бусад хэд хэдэн төрөл зүйлүүд орчин үеийн хүний өвөг дээдэстэй зэрэгцэн амьдарч байсныг эрдэмтэд тогтоосон юм.

Бидний өвөг дээдэс тэдний заримтай нь эвцэлдэж байсан баримт ч бий.

Саяхан бас хэсэг эрдэмтэд Израйлын газар нутгаас эртний хүний шинэ төрөл зүйл байж болзошгүй олдворыг илрүүлснээ Science сэтгүүлд мэдээлсэн юм.

120,000-аас 420,000 жилийн өмнө Ойрх Дорнодод амьдарч байсан уг төрөл зүйл нь орчин үеийн хүний өвөг дээдэс болон Неандертальчуудтай харьцуулахад илүү мич төрхтэй байжээ.

Эх сурвалж: CNN