Уншиж байна ...
Зураг
Зураг
ХУУЧИРСАН МЭДЭЭ: 2021/06/16-НД НИЙТЛЭГДСЭН

Б.Саранчимэг: Үндэсний ном, бичиг соёлын өдрүүдийг бүх нийтийн амралтын өдөр болгохгүй

Т.Өлзийбаяр, iKon.mn
2021 оны 6 сарын 16
iKon.MN
Зураг зураг
mpa.mn
Төрийн байгуулалтын байнгын хорооны өнөөдрийн хуралдаанаар Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төслийг хэлэлцлээ. 
 
УИХ-ын гишүүн Ц.Мөнхцэцэг, Б.Саранчимэг, Ч.Ундрам нар уг хуулийн төслийг 2020 оны есдүгээр сарын 18-ны өдөр өргөн мэдүүлжээ. 
 
Хууль санаачлагчийн илтгэлийг УИХ-ын гишүүн Б.Саранчимэг танилцууллаа. Тэрбээр "Дэлхийн 100 гаруй улс оронд номын баярыг тэмдэглэн өнгөрүүлдэг.
 
Манай улсын хувьд 2000 оноос эхлэн зарим төрийн бус байгууллага номын баярыг тэмдэглэж ирсэн. Монголын зохиолч, хэвлэн нийтлэгч, уншигчид энэхүү арга хэмжээнд өргөнөөр оролцож байна.
 
Иймд нийтээр тэмдэглэн өнгөрүүлдэг үндэсний номын өдөртэй болох нь зүй ёсны хэрэг юм. Ерөнхийлөгчийн 2012 оны зарлигаар жил бүрийн есдүгээр сарын гурав дахь долоо хоногийн Бямба гарагт номын баярын өдрийг улс орон даяар тэмдэглэн өнгөрүүлсээр ирсэн. 
 
Ном уншлагыг дэмждэг, хэвлэлийн компани, ном сонирхогчдын клубийн уялдаа холбоог сайжруулах, номын үйлчилгээг иргэдэд ойртуулах зорилгоор номын баярыг тэмдэглэн өнгөрүүлэх хуулийн төсөл боловсруулсан.

Үндэсний ном, бичиг соёлын өдрүүдийг тав, есдүгээр сарын гурав дахь долоо хоногийн амралтын өдрүүдэд тэмдэглэнэ

Хуулийн төсөл нь хуульд нэмэлт оруулах хэлбэрээр боловсруулагдсан бөгөөд Нийтээр тэмдэглэх баярын болон тэмдэглэлт өдрүүдийн тухай хуулийн тавдугаар зүйлд үндэсний ном, бичиг соёлын өдрүүд, тав болон есдүгээр сарын гурав дахь долоо хоногийн амралтын өдрүүдэд тэмдэглэнэ гэсэн заалт нэмэх тухай юм.

Амралтын өдрүүд гэдэг нь Бямба, Ням гарагт тэмдэглэн өнгөрүүлж байхаар тусгасныг дахин хэлье. Энэ нь тэмдэглэлт өдөрт орж байгаа болохоос биш энэ өдрийг амралтын өдөр болгон өөрчлөхгүй" гэлээ. 

Төрийн байгуулалтын байнгын хорооны гишүүдийн 66.7 хувь нь Нийтээр тэмдэглэх баярын болон тэмдэглэлт өдрүүдийн тухай хуульд нэмэлт оруулах тухай хуулийн төслийг хэлэлцэхийг дэмжив.