ТООЦООЛОЛ: Хөл хориог урт хугацаанд биш богино, олон дахин тогтоох нь үр дүнтэй
Судлаачдын бүлгээс цар тахлын үед хөл хориог ямар хугацаанд тогтоох нь тархалтыг бууруулахад илүү үр дүнтэй байх талаар тооцоолол гаргажээ. Уг тооцооллыг МУИС-ийн судлаач, доктор Т.Бэгзсүрэн танилцууллаа.
Тэрбээр “Дотоодод халдвар гарснаас хойш судлаачдын бүлэг тогтмол тооцоолол, судалгааг хийж байгаа. Хамгийн сүүлд 2021 оны нэгдүгээр сарын 3-нд тооцоолол хийсэн. Үүгээр нэгдүгээр сарын 6-нд хөл хориог цуцалбал халдварын нөхцөл байдал ямар болох вэ, тав эсвэл долоо хоног сунгавал цаашид халдварын тохиолдлын тоо хэд болох вэ гэдгийг бодсон. Ингэхэд 10-нд цуцлах нь хамгийн эерэг байх боломжтой, гэхдээ цаашид хөд хориог дахин тогтоох шаардлагатай гэх үр дүн гарсан.
График 1, Хөл хорио ба халдварын тархалтын тооцоолол
Мөн урт хугацаанд хөд хорио тогтоох нь үр дүнтэй бус юм. Үүнийг тайлбарлахын тулд дараах жишээг авъя.
Хүн ам гурван долоо хоног чөлөөтэй явж байгаад хоёр долоо хоногийн хугацаанд хөл хорионд орвол халдвар тархалтын зүй тогтол бол эхний үедээ удаан тархах боловч 1-2 долоо хоногийн хугацаа өнгөрсний дараа эрчимтэй өснө. Өөрөөр хэлбэл, хөл хорионы хугацаанд халдварын тохиолдол буурах боловч урт хугацаанд нөлөө багасна.
График 2, Хөл хорионы хугацааг хэрхэн тогтоох тухай тооцоолол
Хэрэв хоёр долоо хоногийн хөл хориог хоёр хувааж, долоо, долоо хоногоор нь ээлжилж тогтоовол тохиолдлын тоо буурсан хэвээр байна. Иймд, урт хугацаанд хөл хорио тогтоосноос богино хугацаатайгаар олон удаа тогтоох нь үр дүнтэй байна. Ингэхдээ хамгийн үр дүнтэй байх хугацаа нь 9-10 хоног байна. Уг тооцооллыг тархалтын динамик, үечлэлүүд дээр тулгуурлан гаргасан" гэлээ.
Түүнчлэн МУИС-ийн судлаач, доктор Т.Бэгзсүрэн “Халдвар авсан хүн эхний 2-4 хоног далд үедээ байх бөгөөд шинж тэмдэггүй байна. Дараагаар нь 1-3 хоногт халдвар тарааж эхэлнэ. Харин шинж тэмдэг илэрсэнээр эмнэлгийн байгууллагад хандтал ойролцоогоор 2-3 хоног шаарддаг байна. Энэ үеийг халдвар тараах үе гэнэ. Үүний дараа эмнэлгийн тусламж авсанаар эмчлэгдэж буй бүлэг рүү шилжинэ. Нийт өвчтөний 17 хувь нь шинэ тэмдэг илэрдэггүй ч гадуур халдвар тараадаг. Харин Монголын тухайд энэ тоо 20-30 хувь байна” гэв.
График 3, Халдвар тараах эрчим
ВИДЕО:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
25 СЭТГЭГДЭЛТЭЙ
|
