TikTok, WeChat аппликэйшнүүдийн ажиллагааг Ням гарагаас эхлэн АНУ-д хязгаарлах шийдвэр гарлаа

Хятадын компаниудын бүтээгдэхүүн болох TikTok, WeChat аппликэйшнүүдийн ажиллагааг Ням гарагаас эхлэн АНУ-ын нутаг дэвсгэрт хязгаарлах шийдвэрийг тус улсын худалдааны яам гаргасан байна.

Тодруулбал WeChat аппликэйшнийг Америкийн хэрэглэгчид гар утсандаа татаж суулгах боломжгүй болохоос гадна нэгэнт ашиглаж байгаа хэрэглэгчид төлбөр тооцоо хийх, мөнгө шилжүүлэх зэрэг үйлдлүүдийг гүйцэтгэх боломжгүй болж байгаа гэнэ.

Харин TikTok аппликэйшний хувьд одоогоор хэвийн ажиллах ч шинэ хувилбарыг нь татах боломжгүй болох ажээ. Мөн тус үйлчилгээг Америкийн компанид зарах яриа хэлэлцээ арваннэгдүгээр сарын 12-ноос өмнө амжилттай болоогүй тохиолдолд WeChat шиг бүрэн хаагдахаар болсон байна.

Хятадын компаниудын эрхэлдэг сошиал платформууд иргэдийн хувийн мэдээллийг Бээжингийн эрх баригчдад дамжуулдаг нь АНУ-ын үндэсний аюулгүй байдалд заналхийлж байна гэсэн үндэслэлээр Трампын засаг захиргаа эдгээр аппликэйшнүүдийг хориглох шийдвэр гаргасан юм.

Ингэхдээ WeChat-ийг бүр мөсөн хориглож, TikTok-т АНУ дахь үйл ажиллагаагаа Америкийн технологийн компанид шилжүүлэх хугацаа өгсөн байна.

Одоогоор TikTok-ийн тодорхой хувийг худалдаж авах замаар хэрэглэгчийн мэдээллийг нь удирдах, хянах эрх олж авах нөхцлийг АНУ-ын Oracle компани Хятадын ByteDance компанитай ярилцаж байгаа.

Хэрвээ энэ гэрээ амжилттай болж, Трампын засаг захиргаа зөвшөөрөл өгвөл TikTok платформ АНУ-ын зах зээлд хэвээр үлдэх юм.

Өчигдөр сэтгүүлчидтэй уулзахдаа Дональд Трамп ”TikTok бол маш өргөн хүрээнд ашиглагддаг гайхамшигтай бүтээгдэхүүн. Бидэнд шаардлагатай байгаа аюулгүй ажиллагааг хангах тохиролцоонд хурдан хүрч чадвал маш олон хүн баярлахаар байна” гэж мэдэгджээ.

Хятадын ByteDance компанийн эзэмшдэг TikTok нь богино хэмжээний дүрс бичлэг хуваалцах зориулалттай сошиал үйлчилгээ юм. Тус компани дэлхий даяар 800 сая гаруй хэрэглэгчтэй болоод байгаа ба АНУ-д 100 гаруй сая идэвхтэй хэрэглэгчтэй гэдэг.

WeChat нь 2011 онд Хятадын Tencent компаниас гаргасан мессенжэр үйлчилгээ юм. Хятадад уг үйлчилгээг чатлах, төлбөр тооцоо хийх, мөнгө шилжүүлэх зэрэг олон зорилгоор ашигладаг ба нийтдээ нэг тэрбум орчим идэвхтэй хэрэглэгчтэй.

ByteDance, Tencent компаниуд АНУ-ын зах зээлд бизнесээ хадгалж үлдэхийн тулд Трампын засаг захиргаатай яриа хэлэлцээгээ үргэлжлүүлэхээ өчигдөр мэдэгджээ.

Эх сурвалж: BBC