• 11 сарын 25, Даваа
|
Уншиж байна ...
ХУУЧИРСАН МЭДЭЭ: 2020/09/09-НД НИЙТЛЭГДСЭН

Монгол Улс "биелүүлээгүй" гэж үнэлүүлсэн ФАТФ-ын дөрвөн зөвлөмжөөс хоёрыг нь шат ахиулж чаджээ

Б.Жаргалмаа, IKON.MN
2020 оны 9 сарын 9
iKon.MN
Зураг зураг
Гэрэл зургийг MPA.mn
00:00 00:00
Монгол Улс "биелүүлээгүй" гэж үнэлүүлсэн ФАТФ-ын дөрвөн зөвлөмжөөс хоёрыг нь шат ахиулж чаджээ
Sara, ikon.mn - text to speech

Мөнгө угаах, терроризмыг санхүүжүүлэхтэй тэмцэх олон улсын байгууллага(ФАТФ)-аас Монгол Улсыг Саарал жагсаалтад оруулахдаа хамгийн сүүлд дөрвөн зөвлөмжийг биелүүлээгүй хэмээн үнэлж байв. Тэгвэл тэрхүү дөрвөн зөвлөмжөөс хоёрыг нь шат ахиулж чаджээ. 

ФАТФ-аас тавьдаг 40 зөвлөмжөөс 25 нь Санхүүгийн зохицуулах хороотой шууд болон шууд бус хамааралтай байна. Өнгөрсөн оны Хоёрдугаар явцын тайлангаар хэсэгчлэн биелүүлсэн болон биелүүлээгүй үнэлгээтэй 4 зөвлөмжөөс

  • Зөвлөмж 14 - Мөнгө болон үнэ бүхий зүйлийн шилжүүлэг
  • Зөвлөмж 28 - Санхүүгийн бус бизнес, мэргэжлийн үйлчилгээ үзүүлэгчдийн хяналт шалгалт

гэсэн хэсгийг Санхүүгийн зохицуулах хороо хариуцан ажиллажээ. Энэ хүрээнд

  • Зөвлөмж 14-ийн үнэлгээг ахиулах зорилгоор зөвшөөрөлгүй мөнгөн гуйвуулгыг илрүүлэх, шийтгэлийн хэмжээг зөрчилтэй уялдуулан тогтоох, хууль тогтоомжийн дагуу арга хэмжээ авах, урьдчилан сэргийлэх чиглэлээр Хорооноос Тагнуулын ерөнхий газар, Цагдаагийн ерөнхий газар, Санхүүгийн мэдээллийн алба зэрэг холбогдох байгууллагуудтай үр дүнтэй хамтран ажилласан.
  • Харин Зөвлөмж 28-ийн үнэлгээг ахиулах зорилгоор Санхүүгийн зохицуулах хорооны эрх зүйн байдлын тухай, Мөнгө угаах болон терроризмыг санхүүжүүлэхтэй тэмцэх тухай, Аж ахуйн үйл ажиллагааны тусгай зөвшөөрлийн тухай хуулиудад тус тус нэмэлт, өөрчлөлт оруулж, Улсын Их Хурлаар батлууллаа.
  • Түүнчлэн Үндэсний статистикийн хороотой үнэт металл, үнэт чулуу, эсхүл тэдгээрээр хийсэн эдлэлийн арилжаа эрхлэгчдийг илрүүлэх, эрсдэлийг үнэлэх зорилгоор хамтын ажиллагааны гэрээний хүрээнд хамтран ажиллаж, эрсдэлд суурилсан мөнгө угаах, терроризмыг санхүүжүүлэхтэй тэмцэх чиглэлээрх хяналт шалгалтыг үл хөдлөх эд хөрөнгө зуучлалын байгууллага, үнэт металл, үнэт чулуу, эсхүл тэдгээрээр хийсэн эдлэлийн арилжаа эрхлэгчдэд нэвтрүүлэх ажлыг зохион байгуулсан.

Эдгээр ажлыг хэрэгжүүлсний үр дүнд энэ сарын 4-ний өдөр АНДМУТБ-ээс Монгол Улсын Гуравдугаар явцын тайланг баталж, Зөвлөмж 14-ийг 2 шатаар ахиулж “бүрэн биелүүлсэн”, Зөвлөмж 28-ийг 1 шатаар ахиулж “ихэнхийг биелүүлсэн” гэж дүгнэсэн талаар Санхүүгийн зохицуулах хорооноос мэдээллээ.

Ази, Номхон далайн мөнгө угаахтай тэмцэх бүлэг /АНДМУТБ/ нь ФАТФ-ын бүс нутгийн байгууллага бөгөөд Ази, номхон далайн бүсийн нийт 41 улс, олон улсын байгууллага болон ажиглагч байгууллагуудыг нэгтгэсэн олон улсын хамтын ажиллагааны байгууллага юм.  Манай улс АНБМУТБ-ийн гишүүн орны хувьд мөнгө угаах, терроризмыг санхүүжүүлэхтэй тэмцэх /МУТСТ/ олон улсын стандартыг биелүүлэх үүрэгтэй.

ФАТФ-аас 2016 онд Монгол Улсын мөнгө угаах болон терроризмыг санхүүжүүлэх тогтолцоо, үр дүнтэй байдлын хэрэгжилтийг үнэлэх ажлыг зохион байгуулж, Харилцан үнэлгээний тайланг 2017 онд баталж, мөнгө угаах, терроризмыг санхүүжүүлэхтэй тэмцэх тогтолцоо буюу ФАТФ-ын 40 зөвлөмжийн биелэлтийг хангалтгүй гэж дүгнээд үүнээс 40 зөвлөмжийн 5-ыг биелүүлээгүй, 15-ыг нь хагас биелүүлсэн гэж дүгнэсэн. Иймээс дээрх 20 зөвлөмжийн үнэлгээг дээшлүүлэх зорилгоор Хоёрдугаар явцын тайланг 2019 онд хүргүүлж, эдгээрийн 16 зөвлөмжийн үнэлгээг 1-2 шатаар ахиулсан хэдий ч 4 зөвлөмжийн үнэлгээг ахиулаагүй байсан билээ.

Гуравдугаар явцын тайлантай ЭНД дарж танилцах боломжтой.