• 11 сарын 25, Даваа
|
Уншиж байна ...

PUBG MOBILE: Манай улсын "Falcons Force" баг PMGC 2024 тэмцээний "Grand Finals" шатанд шалгарлаа

Н.Эрхбаяр, iKon.mn
1 цаг 57 минутын өмнө
iKon.MN
Зураг зураг
PUBG MOBILE

Цахим спортын PUBG MOBILE тоглоомын дэлхийн аварга шалгаруулах тэмцээн (PMGC 2024)-ий лигийн шатны "Last Chance"-д шалгарсан 16 багийн тоглолтууд өчигдөр Малайз улсад зохион байгуулагдаж дууслаа. 

"Last Chance" шатнаас зургаан баг дэлхийн аваргад оролцох эрх авах бөгөөд манай улсаас "4Merical Vibes", "Falcons Force", "Stalwart Esports" гурван баг өрсөлдлөө.

12 тоглолтын нийлбэр дүнгээр Саудын Арабын хөрөнгө оруулалттай "Falcons Force" баг 141 оноотойгоор хүснэгтийн нэгдүгээр байрт бичигдэв. Харин "4Merical Vibes" баг 69 оноотойгоор долдугаар, "Stalwart Esports" баг 52 оноотойгоор 11 дүгээр байрт бичигдсэн амжилттайгаар тэмцээнээ өндөрлүүллээ.

Ийнхүү өнгөрсөн жилийн ДАШТ-ий хоёрдугаар байрт ACTION, TOP, ICY гэсэн тоглогчдоор багаа бүрдүүлсэн "Falcons Force" манай улсыг төлөөлөн PMGC 2024 тэмцээнд оролцох ганц багаар тодорч, ирэх сард Английн Лондон хотыг зорихоор болж байна.

PMGC 2024 тэмцээний "Grand Finals" шатны тоглолтууд энэ оны арванхоёрдугаар сарын 6-8-нд зохион байгуулагдах бөгөөд нийт 16 баг оролцож, 18 тоглолтын нийлбэр дүнгээр аваргаа тодруулна. 

Манай улсын дөрвөн багийн гурав нь лигийн шатнаас тэмцээнээ өндөрлүүлсэн хэдий ч тодорхой хэмжээний мөнгөн шагнал хүртэж байгаа. Тухайлбал "IHC Esports" баг $22,000, "Stalwart Esports" баг $35,000, "4Merical Vibes" баг $38,000 шагналын санг хүртэж буй аж.