2019 онд 81 гол мөрөн, 287 булаг шанд сэргэсэн байна
2019 онд 81 гол мөрөн, 287 булаг шанд, 78 нуур тойром, 11 рашаан сэргэсэн гэсэн судалгааг Экологийн цагдаагийн албанаас танилцууллаа.
Ойн нөөцийн хомсдол, усны бохирдлын эх үүсвэр түүний учир шалтгааныг арилгах, бууруулах, экологийн тэнцвэрт байдал алдагдахаас урьдчилан сэргийлэх зорилгоор иргэд олон нийтэд мэдээлэл өгөх, иргэдийн оролцоог нэмэгдүүлэх, ард иргэдийн буруу дадал хандлагыг өөрчлөх, зөв соёлыг төлөвшүүлэх зорилгоор “Цэнхэр алт”, “Ой мод” хамгааллын хэсэгчилсэн арга хэмжээг улс орон даяар зохион байгуулахаар болжээ.
Энэ оны есдүгээр сарын 3-наас нэг сарын хугацаанд улсын хэмжээнд өрнөх арга хэмжээг Экологийн цагдаагийн алба, БОАЖЯ-ны Ойн бодлого зохицуулалтын газар, НҮБ-ын Хүнс хөдөө аж ахуйн байгууллага, Усны газар хамтран зохион байгуулж байна.
Засгийн газрын 2020 оны дөрөвдүгээр сарын 1-ний өдрийн 121 тогтоолоор Усны газрыг байгуулсан бөгөөд усны нөөц, ус ашиглалт, хяналт шинжилгээ үнэлгээний гэсэн мэргэжлийн гурван хэлтэстэйгээр үйл ажиллагаагаа явуулж эхэлжээ.
"Улсын хэмжээнд 360 гаруй усны ордын нөөцийг тодорхойлон ашиглаж байна"
Тус газрын Усны нөөцийн хэлтсийн дарга Я.Болдбаатар "Монгол орон усны нөөцөөр тийм ч баялаг орон биш. Нийт нутаг дэвсгэрийг хангай, тал, говийн гэсэн гурван бүсэд хуваадаг бөгөөд хангайн бүсэд гадаргын усан сүлжээ сайн бол говийн бүсэд гадаргын усан сүлжээ байхгүй тул гүний усыг ашигладаг. Усны нөөц нийт нутаг дэвсгэрийн хувьд жигд биш тархалттай тул нөөц дээр тулгуурласан ашиглалт хийх шаардлагатай болдог.
Одоогоор улсын хэмжээнд 360 гаруй усны ордын нөөцийг тодорхойлон ашиглаж байна.
Ус ашиглалтын менежментийг сайжруулах хүрээнд ХАА-н усан хангамжийн чиглэлээр "Хөх морь" төслийг хэрэгжүүлж байна. Энэ хүрээнд 12 томоохон голын 33 байршилд далан барьж, бороо, цасны болон үерийн усыг хуримтлуулж ашиглах, цаашлаад гадаргын ус муутай говийн бүс рүү татах төслийн судалгаа хийгдээд явж байгаа.
Мөн усыг дахин цэвэршүүлж ашиглах бодлогыг баримтална. Уул уурхайн компаниудын хувьд хэрэглэсэн усныхаа 70 хувийг цэвэршүүлэн дахин ашиглаж байгаа. Улаанбаатар хотод үйл ажиллагаа явуулдаг томоохон үйлдвэрүүд хэрэглэсэн усаа цэвэршүүлэн өөр шат дамжлага дээрээ ашиглаж байгаа жишиг бас бий" хэмээн ярилаа.
Экологийн цагдаагийн албаны мэдээллээр улсын хэмжээнд оны эхний 8 сард хүрээлэн байгаа орчны эсрэг гэмт хэрэг, зөрчлийн шинжтэй нийт 1,189 гомдол, мэдээлэл хүлээн авч шалгасан нь урьд оны мөн үеэс бүртгэгдсэн гомдол 771 буюу 1.8 дахин өссөн байна.
