Улсын Онцгой Комиссын хуралдаанаас гарсан шийдвэрийг танилцуулж байна.
ШУУД ҮЗЭХ:
ГХЯ-ны Консулын газрын захирал Л.Мөнхтүшиг: УОК-ын ээлжит хуралдаан сая болж, өндөрлөлөө.
Хуралдаанаар Гадаад харилцааны яамнаас хилийн чанадад байгаа иргэдээ татан авах дараагийн тусгай үүргийн нислэгүүдийн төлөвлөгөөг хэлэлцүүлж, батлууллаа.
Зургаадугаар сард 9 нислэг хийхээр төлөвлөсөн.
Долдугаар сарын дунд үе хүртэл өндөржүүлсэн бэлэн байдлын хугацааг сунгах чигтэй байна. Иймд долдугаар сарын эхний хагаст үйлдэх тусгай үүргийн нислэгийн төлөвлөгөөг гаргасан.
Мөн БНХАУ-д байгаа нутаг буцах хүсэлтэй 164 иргэнийг ойрын хугацаанд Замын-Үүд боомтоор татаж авах шийдвэр гаргасан.
Мэдээллийн төгсгөлд тэрбээр сэтгүүлчдийн асуултад хариулт өгсөн юм.
- ОХУ-руу ялалтын парадад оролцохоор хүмүүс явах шаардлага байсан уу?
- Би ГХЯ-ны Консулын газрын захирлын хувьд энэ асуултад шууд хариулах боломжгүйг ойлгоорой. Манай улсын 75 цэргийн албан хаагч ОХУ-д ялалтын парадад оролцох бэлтгэлийг хангаж байгаа.
- БНХАУ-д коронавирусийн шинэ халдвар гарсан гэсэн. Үүнтэй холбоотойгоор манай улс авч буй арга хэмжээндээ өөрчлөлт оруулах шийдвэр гарсан уу?
- Бээжин хотын томоохон хүнсний захад эх үүсвэр нь тодорхойлогдоогүй шинэ халдварын голомт үүссэн мэдээллийг бид шуурхай авсан. Авсан даруйдаа УОК-т мэдээллийг танилцуулсан. Өнөөдрийн хуралдаанаар Гадаад харилцааны яамнаас УОК-т мэдээлэл болгож танилцууллаа. Энэ талаар УОК-ын Шуурхай штабаас тун ойрын хугацаанд мэдээлж, ямар дэглэм горим хэрэгжүүлэхийг зарлана.