"Ерөнхий сайдын гэр бүл огцроод, МАН-ын хамгаалалтаас гарвал маш хүнд зам туулна. Энэ баталгаатай шүү”

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын гишүүн Ч.Лодойсамбуу Ерөнхий сайд Л.Оюун-Эрдэнийг огцруулах тухай санал гаргаж, гишүүдийн гарын үсэг цуглуулж эхэлсэн талаараа мэдээлэл хийв. Мэдээллийн үеэр сэтгүүлчдийн асуултад хариулсныг товчлон хүргэж байна.

-32 гишүүний гарын үсэг цуглуулах амаргүй байх. Засгийн газарт хамтарсан сайд нар гарын үсэг зурах уу. Дараагийн Ерөнхий сайдад горилсон хүмүүсийн шунал засаглалын хямралт үүсгэх вий гэдэг болгоомжлол ч бий. Эдгээр нөхцөл байдлыг хэрхэн харж байна вэ?

-Ерөнхий сайд Л.Оюун-Эрдэнийг 2022 оноос шүүмжилснээс эхлэн надтай холбоотой янз бүрийн юм гарах болсон. Тэрний хүн, янз бүрийн зураг бичлэг гэхчлэн. Саяхан намайг эхнэрээ зоддог гэдэг гүтгэлгийг тэдний багаас явуулсан. Энэ мэт дайралт маш их ирнэ.

Л.Оюун-Эрдэнэ байхгүй болонгуут том төслүүд зогсох юм уу. Л.Оюун-Эрдэнэ Монголын түүхэнд хамгийн ухаантай, хамгийн чадвартай Ерөнхий сайд юм уу. Энэ Засгийн газар хамгийн хүнд ачааг үүрээд байгаа юм уу.

АН-ын сайд нарыг гарын үсэг зурахгүй гэж хэлэх боломжгүй. Зурж ч болно шүү дээ.

-АН-ын зүгээс танд ямар нэгэн дарамт ирж байна уу?

-Дарамт гэж хүлээж авахаар зүйлүүд ирж байгаа. Хэд хоногийн өмнө “Энэ бол хайрлаад байх Засгийн газар, Ерөнхий сайд биш” гэдэг пост оруулснаас хойш утас тайван байлгахаа больсон. Л.Оюун-Эрдэнэ сайд явуулдаг бүх хүнээ явуулж, яриулдаг бүх хүнээрээ яриулж байгаа. Сүрдүүлж ч үзэж байна.

-Утааны сонсгол болж өнгөрлөө. Та сонсголын талаар ямар байр суурьтай байгаа вэ?

-Сонголын үеэр яригдсан тоон дээр л Ерөнхий сайд гарч ирээд тайлбар хэлэх ёстой байсан. Саяын сонсголоор хэн ч буруугүй, гэхдээ утаатай байна, 700 гаруй хүн нас барсан байна гэдэг дүгнэлтэд хүрсэн. Төрийн байгууллагаас эмнэлгээр үйлчлүүлээд нас барсан 100 гаруй хүний тоог л хэлсэн. Аль болох л нууж, булзааруулах гээд байдаг.

Угаарын улмаас гэр бүлийнхнээ алдсан хүүгийн мэдээллийн дараа нэг бичиг гарч ирсэн. Тэрний дагуу Хууль зүйн сайд өнөөдөр мэдээлэл хийсэн. Би Хууль зүйн сайдын тайлбарт итгэхгүй байна. Тэр цаасан дээрх мэдээлэл хэнд байдаг. Хэн тэгж бичдэг вэ.

Гэмт хэргийн золиос болсон хүн болгон архичин эсвэл хулгайч байдаг. Үргэлж хохирогчийн буруу болдог. Хүнийг хуурах гэж оролддог үйл болгон төрд итгэх итгэлийг байхгүй болгож байна.

Л.Оюун-Эрдэнийг Ерөнхий сайд байх дөрвөн жилийн хугацаанд нийгмийн уур амьсгал ямар болсон бэ. Зурагтаар юу гардаг болсон бэ. Зүгээр л тархи угаадаг. Тэдний гэр бүлээс цацаж байгаа нэвтрүүлгийг үзээд итгэх хүн одоо байхгүй болсон. Хайран нэг уран бүтээлч тэнд дуусаж байгаа.

Монголчууд өнөөдөр улс төрөөс өөр ярих юмгүй болсон. Тийм хэмжээнд хооллож байна. Дээрээс хүн хөрөнгөтэй болох, баяжих бүх боломжийг үгүй хийж байна. Орлогын хувьд өсөх боломжгүй нэгэн хэвд, ярьдаг зүйл нь улс төр. Ингээд байлгаж байвал удирдахад амар. Аль хэдийнээ авторитар дэглэмтэй болсон.

-Таныг тусдаа нам байгуулж байгаа гэх мэдээлэл байгаа.

-Би тусдаа нам байгуулна гэж байхгүй. Тийм боломж бололцоо ч байхгүй. Ер нь бол АН өөрсдөө саналаараа Засгаас гарчхаач гэдэг саналыг МАН-ын голдуу, дараагийн Ерөнхий сайд болчих юм сан гэдэг бодолтой залуус хэлээд байгаа. Би тэр залуусыг бэртэгчин гэнэ. Өөрсдөө үйлдэл хийхгүй, хэн нэгэн үйлдэл хийхээр тэндээс ашиг хонжоо хардаг.

-Гарын үсэг цуглуулахын тулд та яаж ажиллах вэ?

-Би бүгд рүү утсаар ярина. 125 хүн рүү утсаар ярих хэцүү ажил биш. Тэрнийхээ үр дүнг та бүхэнтэй хуваалцана. Ингээд хэлчихээр зарим нь утсаа авахгүй байх. Гэхдээ нүүр нүүрээрээ таарах өдөр ирнэ.

-Ерөнхий сайдыг огцруулах санал гаргаж байгаагийн хувиар дараагийн Ерөнхий сайд хэн байна гэж бодож байна?

-Дараагийн Ерөнхий сайдын талаар ерөөсөө бодоогүй. Эхлээд бид залуу дарангуйлагчаас салах хэрэгтэй.

-Ерөнхий сайдыг огцруулаад явуулчих нь хариуцлагын хэлбэр мөн үү?

-Эхлээд огцрох ёстой. Эдний гэр бүл огцроод, МАН-ын хамгаалалтаас гардаг юм бол маш хүнд замыг туулна. Энэ бол баталгаатай шүү.

-Засгийн газар огцорвол дараагийн ээлжийнхэн “хоолонд” орно. Үүнээс ард түмэн юу хожих вэ?

- Залуу дарангуйлагчаас салахаас өөрөөр ард түмний хожил гэж юу байх юм.

2022 оноос хойш Ерөнхий сайд байсан хүн анхнаасаа энэ түлш буруу байсан юм гэдэг ухуулга хийж байна. Анхнаасаа буруу байсныг нь мэдэж байсан юм бол яагаад болиулаагүй юм. Юу ч хийгээгүйгээс нь болоод энэ олон хүн нас барсан. Гэтэл яагаад гарч ирээд ганц үг хэлэхгүй байгаа юм бэ. Яагаад сэтгүүлчдийн өмнө гарч ирж, асуултад ил тод хариулаад, олон нийтийн өмнө нүүр бардам гараад ирж чаддаггүй юм бэ. Яагаад уучлал гуйж, эмгэнэл илэрхийлж чаддаггүй юм бэ. Улам л гэдийгээд, цом шиг болоод байх юм Монголын дарга нар.