Н.Сувдмаа: Орчилд байгаа рина вирус бага насны хүүхдүүдэд илүү хүнд илэрч, бачуурал үүсгэх эрсдэлтэй

Гэрэл зургийг MPA агентлагийн онцгой зөвшөөрөлтэйгөөр ашиглав

Томуу, томуу төст өвчний нөхцөл байдлын талаар Халдварт Өвчин Судлалын Үндэсний Төв (ХӨСҮТ) мэдээлэв. 

ХӨСҮТ-ийн нэгжийн дарга Н.Сувдмаа "14 аймаг, Улаанбаатар хотод алаг цоог хэлбэрийн томуугийн дэгдэлттэй байна. Харин 4-5 аймаг идэвхжлийн түвшинд байгаа.

Эмнэлэгт хэвтэлт харьцангуй намжсан, орны ачаалал бага байна. Тодруулбал 420 гаруй ороор цөөрсөн. Гэхдээ томуу, томуу төст өвчний халдвараар амбулаторид үзүүлж байгаа нийт үйлчлүүлэгчийн 60-70 гаруй хувь нь 15 хүртэлх насныхан байгаа.

Тэр дотроо 40 гаруй хувийг 1-5 хүртэлх насны хүүхдүүд эзэлжээ.

Эргэлтэд ямар вирус давамгай байгааг байнга тандаж байна. Сүүлийн долоо хоногуудад А хүрээний H1N1 эргэлтэд хэвээр байгаа. 

Мөн томуу төст вирусүүдээс:

• Амьсгалын синситал вирус
• Рина вирус сорьцод илэрч байна. 

Эдгээр вирусийн гол онцлог нь бага насны хүүхдүүдэд илүү хүндрэл үүсгэх эрсдэлтэй. Амьсгалын дээд замд байршиж, тодорхой хугацааны дараа амьсгалын замын эрхтнүүдийг гэмтээх, цаашилбал хатгалгаа болох эрсдэл бий.

Мөн бачуурал үүсгэх эрсдэлтэй учраас эцэг, эхчүүд, асран хамгаалагчид онцгой анхаарахыг зөвлөе" хэмээв.