Багдад дахь АНУ-ын элчин болон цэргийн бааз пуужингийн цохилтод өртжээ
Өчигдөр буюу Бямба гарагийн орой Иракийн нийслэл дэхь АНУ-ын элчин сайдын яам байрладаг “Green Zone” хэмээх өндөр хамгаалалттай бүс миномётын хоёр удаагийн цохилтод өртжээ.
Мөн үүнтэй зэрэгцэн Багдадын ойролцоох АНУ-ын цэргийн бааз хоёр удаа пуужингийн цохилтод өртсөн байна. Эдгээр цохилтын улмаас ямар хохирол учирсан талаар мэдээлэл ил болоогүй байна.
Өмнөх өдөр нь АНУ-ын армийн зохион байгуулсан агаарын цохилтод Ираны нөлөө бүхий генерал Кассем Солеймани алагдсан билээ.
Миномётын цохилтын нэг нь “Green Zone”-ий дотор талд, нөгөө нь гадна талд туссан байна. Энэ үеэр АНУ-ын элчин сайдын яамны байранд түгшүүрийн дохио дуугарч байсныг гэрчүүд мэдээлжээ.
Үүний дараа Багдадын хойд хэсэгт оршдог Балад агаарын баазад Катюша төрлийн хоёр пуужин туссан байна. Энд АНУ-ын цэрэг байрладаг юм.
Цохилтын дараа түгшүүрийн дохио дуугарч, тагнуулын дронууд цохилтыг хаанаас хийснийг тодруулахаар нисэж эхэлснийг тэнд байсан гэрчүүд мэдээлжээ.
Сүүлийн саруудад Багдад дахь АНУ-ын элчин сайдын яам болон Иракт байрлаж буй Америкийн 5,200 цэргийг чиглэсэн пуужингийн цохилтууд нэмэгдэж байгаа. Эдгээрийг Иран болон Ирак дахь тус улсын холбоотнууд үйлдэж байгаа гэж Вашингтоны тал буруутгадаг.
Өнгөрсөн сард болсон ээлжит цохилтын үеэр Иракийн умард хэсэгт ажиллаж байсан АНУ-ын армийн гэрээт ажилтан алагдсан юм. Хариуд нь АНУ-ын арми Ираны талыг баримтлагч Иракийн зэвсэгт бүлэглэлд агаарын цохилт өгсний улмаас 25 хүн алагдсан байна.
Баасан гарагт Багдадын нисэх онгоцны буудал дээр Ираны генералын амийг хөнөөсөн явдал Ирак дахь Америкчуудын эсрэг халдлагыг улам эрчимжүүлэх төлөвтэй боллоо.
Эх сурвалж: AFP
