Ойрх Дорнод руу АНУ цэрэг илгээж, Их Британи дайн хүсэхгүй байгаагаа мэдэгдлээ

Ираны армийн генералын амийг хөнөөснийхөө дараа Ойрх Дорнодын бүс нутаг руу 3,000 орчим цэрэг нэмж илгээж байгааг АНУ-ын албаны эх сурвалж мэдээлжээ.

Баасан гарагт Ираны элит хүчний командлагч, генерал Кассем Солеймани Иракийн нийслэл Багдадын нисэх онгоцны буудалд АНУ-ын агаарын довтолгоонд өртөж амиа алдсан юм.

Тэрээр Ираны хамгийн алдартай цэргийн эрхтэн байсан бөгөөд Ойрх Дорнодын бүс нутагт Тегераны эрх ашгийг хамгаалах бодлогыг хэрэгжүүлдэг гол хүн байжээ.

АНУ-ын ерөнхийлөгч Дональд Трампын тушаалаар гүйцэтгэсэн энэхүү агаарын цохилт тус бүс нутаг дахь Вашингтоны холбоотнууд болох Саудын Араб, Израйлийг аюултай нөхцөл байдалд оруулж байна.

Энэ явдалтай зэрэгцэн АНУ-ын чухал холбоотон Их Британийн засгийн газар Ирантай дайн хийх сонирхолгүй байгаагаа Вашингтонд мэдэгджээ.

Британийн гадаад хэргийн сайд Доминик Рааб “Генерал Кассем Солейманигийн удирддаг Кудс тусгай хүчний учруулж буй аюул заналыг мэдэж байгаа ч зөрчлийг хурцатгах сонирхолгүй байгааг”-аа мэдэгдсэн байна.

Их Британи болон АНУ-ын бусад холбоотнуудад Трампын засаг захиргаа Кассем Солейманийг устгах агаарын ажиллагааны талаар урьдчилж мэдэгдээгүйг эх сурвалжууд баталжээ.

Өчигдөр Ираны шашны тэргүүн Аятолла Хамени төв телевизээр үг хэлэхдээ улс даяар гурван өдрийн гашуудал зарлаж, генералын өшөөг АНУ-аас авахаа амласан юм.

АНУ-ын засгийн газар Солейманийг олон зуун цэргийнх нь үхэлд буруутай, цаашдаа олон аюултай халдлага зохион байгуулахаар төлвлөж байсан хэмээн тайлбарлаж байна.

Пентагоноос гаргасан мэдэгдэлд “Уг ажиллагаа нь Ираны зүгээс үйлдэхээр төлөвлөж байсан олон халдлагыг таслан зогсооход чиглэсэн юм” гэжээ.

Эх сурвалж: Reuters