“Эрүүл мэндийн сайдыг хуулийн байгууллагад шалгуулна”

Гэрэл зургийг mpa.mn

Ардчилсан Намын Эрүүл мэндийн бодлогын зөвлөлийн дарга Ж. Амарсанаа, “Хөгжлийн төлөөх эмэгтэйчүүд” ТББ-ын дарга Г.Хажидмаа, иргэн М.Зундуйдаваа нар Эрүүл мэндийн сайд Д.Сарангэрэлийг 72 цагийн дотор огцруулахыг шаардаж, Ерөнхий Сайд У.Хүрэлсүхэд хандаж байгаа ажээ.

Мөн Д.Сарангэрэл сайдыг хуулийн байгууллагад шалгуулах асуудлаар өнөөдөр мэдээлэл хийлээ.

 

Гэрэл зургийг mpa.mn

Иргэн М.Лундуйдагва “Энэ жил эрүүл мэндийн салбарыг тойрсон ноцтой асуудлууд удаа дараа гарч буйгаас олны дургүйцлийг хамгийн их хүргэсэн нь сүрьеэгийн дэглэлт юм. Хэд хэдэн сургууль дээр хүүхдүүд хэдэн зуугаараа сүрьеэгийн халдвар авчхаад байна. Гэтэл салбарын удирдлагууд нь байдаг л зүйл мэтээр тайлбар хийж, хариуцлага нэхсэн нэгнийг доромжиллоо хэмээн мэдэгдсэн” хэмээв.

Сүрьеэгийн дэгдэлт 2018 онд 15-р сургууль дээр гарсан талаар тухайн үед Сүрьеэ судлалын мэргэжлийн салбар зөвлөлийн ерөнхий мэргэжилтэн Г.Цогт салбарын сайд Д.Сарангэрэлд дүгнэлт, зөвлөмж хүргүүлж байжээ.

Зөвлөмж: /Зураг дээр дарж томруулж үзнэ үү/

Энэ талаар АН-ын Эрүүл мэндийн бодлогын зөвлөлийн дарга Ж.Амарсанаа “2018 оны дөрөвдүгээр сарын 9-ний өдөр Сүрьеэ судлалын мэргэжлийн зөвлөлөөс Д.Сарангэрэл сайдад ирүүлсэн дүгнэлт, зөвлөмжид тус сургуулийн хүүхдүүдийг сар болгон шинжилгээнд хамруулах, дэгдэлтийн үед яаралтай арга хэмжээ авах удирдамж гаргах гэсэн боловч жил гаруйн хугацаанд үүний дагуу удирдамж боловсруулж ажиллаагүй.

Энэ нь Зөрчлийн тухай хуулийн зургаадугаар зүйлийн 6.7.4-т зааснаар “Бусдын эрүүл мэндэд хохирол учруулах халдварт өвчтэй хүн, нян тээгч, тэдгээртэй хавьтагчийг тусгаарлах, эсхүл хөл хорио тогтоох журмыг зөрчсөн бол”... Төрийн албаны тухай хуулийн 37 дугаар бүлгийн 37.1.13-т заасан “Албан тушаалын тодорхойлолтод заасан зорилго, зорилт, чиг үүргийн хэрэгжилтийг хангах” үүргийг биелүүлж ажиллаагүй гэж үзэх үндэслэлтэй байна” хэмээн ярилаа.

Г.Хажидмаа: Д.Сарангэрэл сайдыг огцрох хүртэл бүх шатны арга хэмжээг авна

 

Гэрэл зургийг mpa.mn

Үргэлжлүүлэн “Хөгжлийн төлөөх эмэгтэйчүүд” ТББ-ын дарга Г.Хажидмаа “Манай байгууллагын зүгээс Д.Сарангэрэл сайдад огцрох шаардлага хүргүүлсэн. Хуулийн хугацаанд хариу өгөөгүй. Бид өөрсдөө очиж үүдийг нь сахиж зогссоор хариугаа авсан. Эндээс ЭМЯ ямархуу байдалтай ажиллаж буйг харж болно. 

Сүрьеэгийн дэгдэлтийн талаарх мэдээллийг тэмбүү өвчний тархалтын талаарх мэдээллээр дарж олон улсад зарлалаа.

Дараа нь бүх ЕБС-ийн сурагчдыг есөн сард ирэхдээ “сүрьеэгийн шинжилгээ хийлгэж ирээрэй” гэж хэлээд тараасан. Зуны гурван сар энэ өвчин дахин дэгдэж Монгол Улсын үндэсний аюулгүй байдалд нөлөөлөхүйц хэмжээнд хүрэх магадлалтай байна” хэмээв.