Бага хурлын гишүүд гэрээгээ зөрчсөн намыг Засгийн газраас гаргахыг дэмжив
МАН-ын Бага хурлын гишүүдийн гурван намын хамтарсан Засгийн газрын үйл ажиллагааг үргэлжлүүлэх үгүйг шийдэх санал хураалтын дүн гарлаа.
"Засгийн газарт хамтран ажиллах гэрээг зөрчсөн улс төрийн намыг оролцуулахгүйгээр Засгийн газрыг бие даан шинээр бүрдүүлэх тухай тогтоолыг батлахыг дэмжих эсэх" гэдэг томьёоллоор санал хураалт явуулахад хуралдаанд оролцсон гишүүдийн олонх буюу 61 хувь нь дэмжсэн байна.
МАН-ын гишүүдийн зүгээс АН-ын зарим гишүүнийг Засгийн газрыг огцруулах жагсаалд оролцож, дэмжиж гарын үсэг зурсан нь гэрээгээ зөрчсөн хэрэг гэж шүүмжилж буй.
Санал хураалтын дүнгээр хамтарсан Засгийн газрыг бүрдүүлж байсан Ардчилсан намыг "хөөх" нь зөв гэж үзэв.
Үүнтэй зэрэгцэн Ерөнхий сайдын огцрох эсэх асуудал хөндөгдөж байгаа. Учир нь Ерөнхий сайд Л.Оюун-Эрдэнэ "АН-ыг засгаас гаргавал би огцорно" хэмээн мэдэгдсэн.
Бага хурлын гишүүдийн өгч буй мэдээллээр АН-ыг хамтарсан Засгийн газраас гаргах, ингэхдээ ХҮН намыг үлдээх эсэх болоод Ерөнхий сайдыг огцруулах асуудлыг намын Удирдах зөвлөл, хамтарсан гэрээний хүрээнд байгуулагдсан Бодлогын зөвлөлөөр хэлэлцүүлэн шийднэ гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
