Korean Air компани Boeing 737 Max загварын онгоцны захиалгаа эргэж харахаар болжээ

Этиопт гарсан онгоцны ослын дараа Өмнөд Солонгосын хамгийн том агаарын тээвэрлэгч Korean Air компани энэ онд багтан зургаан ширхэг Boeing 737 Max онгоц нисгэхээр төлөвлөөд байснаа цуцалж магадгүй болжээ.

“Эцсийн шийдвэрээ гаргахад эрт байгаа ч өчигдрийн осол манай төлөвлөгөөнд нөлөөлж магадгүй боллоо” хэмээн Korean Air компанийн төлөөлөгч хэвлэлд ярьсан байна.

Тус компани ийм загварын 50 ширхэг онгоц худалдаж авах гэрээг 2015 онд Boeing компанитай байгуулж байжээ. Таван сарын өмнө Boeing 737 Max загварын онгоц Индонезийн эрэг орчимд мөн осолдож, 189 хүний амь үрэгдсэн юм.

Дээрх хоёр осол хоорондоо холбоотой нь батлагдаагүй ч хоёул хөөрснөөсөө хойш 15 минутын дотор унаснаараа ижил төстэй байгаа ажээ.

Одоогоор Өмнөд Солонгосын зөвхөн Eastar Jet компани хоёр ийм загварын нисэх онгоц үйлчилгээндээ ашиглаж байгаа бөгөөд энэ оны сүүлээр дөрвийг нэмэх төлөвлөгөөтэй байгаа.

Jeju Air, T’way Air компаниуд дээрх загварыг удахгүй худалдаж авахаар төлөвлөжээ. Гэвч Этиопт гарсан осол эдгээр компаниудын төлөвлөгөөнд нөлөөлж магадгүй болоод байна.

Өмнөд Солонгосын газар, дэд бүтэц, тээврийн яам тус улсад ашиглагдаж байгаа бүх Boeing 737 Max нисэх онгоцнуудад үзлэг шалгалт хийх тушаал өгсөн байна. Мөн бүх авиа компаниудад энэ загварын нисэх онгоцыг шинээр авахаа азнах чиглэл өгчээ.

Дэлхийн олон орны агаарын тээврийн байгууллагууд одоо Этиопт гарсан ослын дүгнэлтийг чих тавин хүлээж байна. Африк тивийн агаарын тээврийн компаниудын аюулгүй байдлын үнэлгээ сайнд тооцогддоггүй ч Ethiopian Airlines нь тивдээ хамгийн шилдэгт тооцогддог байсан юм.

Эх сурвалж: Korea Times