Төгрөгийн ханш 2018 онд 8.9% сулрав

Монгол мөнгөн тэмдэгтийн ханш 2018 онд нийт 8.9 хувь сулрав. Оны эхэнд Монголбанкны нэрлэсэн ханшаар нэг ам.доллар 2,427.13 төгрөг байсан бол арванхоёрдугаар сарын 31-ний байдлаар 2648 төгрөг болж, 220 төгрөгөөр чангарчээ. 

2019 он гармагч төгрөгийн ханш дахин эрчимтэй суларсаар 2,666 төгрөгөөр нэг доллар худалдан авах хэмжээнд хүрсэн бол нэгдүгээр сарын 15-наас эргэн чангарсан. Өнөөдрийн байдлаар нэг төгрөгтэй харьцах ам.долларын ханш 2,640 төгрөг болоод байгаа бөгөөд цаашид төгрөгийн ханш тогтвортой чангарна хэмээн Монголбанк таамаглаж байна. 

График 1, төгрөг/ам.доллар албан ханшийн өөрчлөлт,

Учир нь өнгөрсөн жилийн хувьд Монгол Улс 577 сая ам.долларыг зээл болон зээлийн хүүгийн төлбөрт өгсөн бөгөөд эдийн засгийн идэвхжилтэй холбоотойгоор импорт өмнөх оноосоо 36 хувь өссөн. Түүнчлэн АНУ-ын Холбооны нөөцийн банк бодлогын хүүгээ өсгөсөн нь ам.долларын суурь хүү өсөх шалтгаан болсон бөгөөд том гүрнүүдийн худалдааны дайн манай улсын гол түүхий эдүүдийн үнэ дэлхийн зах зээл дээр унахад нөлөөлсөн. Энэ мэт гадаад нөлөө хүчтэй байсан тул Монголбанк валютын нөөцөө 3.5 тэрбум ам.долларт хүргэсэн ч ханшаа тогтоох боломжгүй байсан хэмээн тайлбарлаж буй. 

Тэгвэл 2019 онд манай улсын Засгийн газар ямар нэгэн хүү, өр төлөхгүй бөгөөд Монгол Улсыг чиглэх валютын урсгал нэмэгдэнэ гэсэн хүлээлттэй байна. Тухайлбал, ОУВС-гийн хөтөлбөрийн хүрээнд энэ онд 800 сая ам.доллар орж ирэх нь. Мөн Монголын Ипотекийн корпораци 250 сая ам.долларын бонд амжилттай гаргажээ. Үүн дээр “Эрдэнэс Тавантолгой”-н IPO-г амжилттай хийвэл мөн валют орж ирнэ хэмээн тооцож байна. 

Монголбанк өнгөрсөн арваннэгдүгээр сард бодлогын хүүг нэмсний дээр хэрэглээний зээлийг хязгаарлах бодлого хэрэгжүүлсний үр дүнд импортын эрэлтийг тодорхой хэмжээнд бууруулах юм. Энэ бүхэн 2019 онд төгрөгийн ханш сулрахгүй байх нөхцөлийг бүрдүүлнэ хэмээн тооцож байна.