Өчигдөр буюу Баасан гарагт Минск хотод сэтгүүлчидтэй уулзахдаа Беларусийн ерөнхийлөгч Александр Лукашенко улс орноо хэзээ ч Оросын нэг хэсэг болохгүй гэж мэдэгджээ.
Тэрээр Оросын хэвлэл мэдээллийн төлөөлөлтэй уулзах үеэр ийм агуулгатай зүйл ярьсан байна. “Беларусийг олон хэсэгт хуваах, эсвэл Оросын нэг хэсэг болгох гэсэн ямар ч оролдлого хэзээ ч бүтэхгүй” хэмээн Лукашенко хэлжээ.
Тэрээр газрын тос, байгалийн хийгээр хөшүүрэгдэн Беларусийг Орост нэгтгэх Москвагийн бодлогыг эрс шүүмжилсэн юм.
“ОК, манай нефтийг ав, гэхдээ хариуд нь улсаа татан буулгаж, Оросын нэг хэсэг бол” гэсэн Москвагийн далд санааг ойлгож байгаагаа Лукашенко энэ үеэр шууд илэрхийлжээ.
Тэр бас Оросын хэвлэлүүд Украины удирдагчдыг дайсан болгон харуулж байгааг шүүмжилсэн байна.
“Би Украинчуудыг мэднэ. Тэд бол дайсан биш. Тэд бол та нарын телевизээрээ харуулдаг шиг муу хүмүүс биш. Ингэхээ болих хэрэгтэй. Одоо ийм зүйлд хэн ч итгэхгүй” гэж Лукашенко сэтгүүлчдэд хатуу сануулжээ.
Беларусь, Орос улсууд цаасан дээр холбоотнууд гэгддэг, зэвсэгт хүчнүүд нь ойр хэлхээ холбоотой боловч Лукашенко улс орныг нь NATO-гийн эсрэг фронт болгох гэсэн Кремлийн бодлогыг хүчтэй эсэргүүцдэг юм.
Тус улс одоо NATO-гийн гишүүн зүүн Европын орнууд болон ОХУ-ын хооронд жийргэвч бүс болоод байгаа.
Москва Беларусийн нутагт өөрийн цэргийн баазыг байгуулах сонирхлоо илэрхийлдэг.
2014 онд Украинаас Крымийн хойгийг хүчээр салгаж өөртөө нэгтгэсэн ОХУ-ын түрэмгий үйлдлийн дараа хөрш орнуудынх нь болгоомжлол нэмэгдээд байгаа юм.
Эх сурвалж: Radio Free Europe /Radio Liberty