Дональд Трамп Сансрын Зэвсэгт Хүчин байгуулах шийдвэр гаргалаа

Өчигдөр болсон АНУ-ын Үндэсний Сансрын Зөвлөлийн хурал дээр ерөнхийлөгч Дональд Трамп арми дотроо Сансрын зэвсэгт хүчний салбар шинээр байгуулах даалгавар өгчээ.

Сансрын зэвсэгт хүчнийг байгуулах асуудал олон жилийн турш маргаантай байсан юм. Армийнхан энэ санааг эсэргүүцэж, оронд нь Агаарын Зэвсэгт Хүчнээ сайжруулж, сансрын уудмын аюул заналаас хамгаалж болох тухай ярьдаг байв.

Харин Трамп уг маргааныг эцэслэж, арми дотор бие даасан салбар байгуулах даалгаврыг зэвсэгт хүчний штабын дарга, генерал Жозеф Данфордод өгсөн байна. Шинэ салбар нь АНУ-ын тагнуулын болон холбооны хиймэл дагуулуудыг хариуцаж, бас хиймэл дагуул устгах, хамгаалах зэвсэг бүтээх зорилготой гэнэ.

Трамп “Сансарт Америкийн байр суурь байх нь хангалтгүй, бид Америкийн ноёрхлыг сансарт бий болгох ёстой. Бидэнд Агаарын зэвсэгт хүчин бий, одоо Сансрын зэвсэгт хүчинтэй болно. Тусдаа гэхдээ ижил түвшний” гэж хэлсэн байна.

Гэхдээ тэр ганцаар ийм шийдвэр гаргаж чадахгүй, Конгрессын дэмжлэг хэрэгтэй юм. Өчигдөр бас Дональд Трамп хувийн салбарын оролцоог сансар судлалд нэмэгдүүлэх зохицуулалтыг баталжээ.

Ингэснээр АНУ-ын батлан хамгаалах салбартын цуглуулсан мэдээлэлд хувийнхан хандах эрхтэй болж байна. Уг шийдвэрийнхээ дараа Трамп Америкийнн Илон Маск, Жэф Безос зэрэг бизнесмэнүүдийн сансрын уудмыг эзэмших хичээл зүтгэлийг магтан сайшаажээ. Тэр “Баян залуус пуужинд дуртай бололтой. Эдгээр баячууд нь Америкийнх бол маш сайн. Хэрвээ тэд биднийг Ангарагт хүргэвэл тун сайн, өөрсдөө ч улам алдаршина. Бид ч асар их мөнгө хэмнэнэ” гэж ярьсан байна.

Эх сурвалж: Quartz