Хар машины дүнг гараар тоолжээ

УИХ дахь Ардчилсан намын бүлэг өнөөдөр бүлгийн ээлжит хуралдааныхаа төгсгөлд сэтгүүлчидтэй хамт сонгуулийн санал тооллогын машины ажиллах горимтой танилцлаа. СЕХ-ноос ерөнхий танилцуулга хийсний дараа уг төхөөрөмжийн дүн үнэн гардаг эсэхийг магадлахын тулд санал хураалт явуулж дүнг нь сэтгүүлчдийн хамт машинаар болон, гараар тоолж гаргалаа.

Энэ үеэр УИХ-ын дарга, АН-ын дарга З.Энхболд:

"Сонгуулийн санал тооллогын машинд эргэлзээд байгаа хүмүүст би ганцхан зүйл хэлж байгаа. 2012 оны УИХ болон нийслэл, орон нутгийн сонгууль, 2013 оны Ерөнхийлөгчийн сонгууль гээд гурван удаа бид энэ машиныг шалгасан. Эдгээр сонгуульд санал тооллогын машиныг хэрэглэхэд саналын тооны ямар нэг зөрүү гараагүй. Зөрүү гарах үндэслэл байхгүй гэдгийг хэлье.

Нэг сонгуульд дунджаар 1,200,000-1,300,000 орчим хүн санал өгч байгаа. Нийт саналын хуудасны зургийг бүх нам, нэр дэвшигч, ажиглагчдад үнэ төлбөргүй тараасан. Тэдгээр хүн бүрт 3,600,000-3,800,000 орчим зураг бий. Нөгөө  талд нь санал тоолсон 2,500 орчим машины дүн гаргасан цаас нь байгаа.

Нэг ширхэг саналын л зөрүү олох юм бол СЕХ-нд мэдэгдээд шалгуулж, арга хэмжээ авахуулж болно

Энэ тараасан файл, тоолсон тооллогын дүн хоёрын дундаас зөрүү гарах юм бол СЕХ авч үзнэ. Энэ нь сонгуулийн санал тоолох машинаар луйвар хийж болохгүйн хамгийн том баталгаа. Та нар хэрэв хардаж байгаа бол шалгах боломжтой. Бүх файл хүмүүсийн гар дээр бий. Сонгууль явуулсан өдрийн орой нь тараачихдаг учир хэн ч түүнийг өөрчлөх боломжгүй. Нэг ширхэг саналын л зөрүү олох юм бол Сонгуулийн Ерөнхий Хороонд мэдэгдээд шалгуулж, арга хэмжээ авахуулж болно. Би 3,600,000 орчим саналын хуудасны тухай ярьж байна. Тэр бүх файл нийт нэр дэвшигч, намууд, ажиглагчдын гар дээр бэлэн байгаа. Ийм л учраас дэлхийн бусад аль ч оронд байхгүй нэг зүйл хэргээр нэмж өгсөн. Монголчууд их хардамтгай учраас бүх зүйлийг ил болгосон, энэ сонгуульд нуух зүйл ерөөсөө байхгүй. 

 

Ирэх оны сонгуулийг энэ санал тооллогын машинаар явуулна. Санал тооллогын машины талаар өнөөдөр УИХ-д суудалтай намууд бүлгийн хурал дээрээ танилцаад, суудалгүй намууд үдээс хойш СЕХ-н дээр танилцана гэсэн. Түрүүчийн УИХ-ын үед энэ машиныг авсан. Авснаасаа хойш гурван удаагийн сонгуулиар шалгачихаад байхад итгэхгүй байна гэдэг бол цэвэр улстөрийн шалтгаантай л гэж харж байна. Гараар тоолох нь ч нээлттэй байгаа. СЕХ энэ машиндаа итгэлтэй байгаа нь зөв. Үүнээс сайн аргыг дэлхийн улс орнууд одоогоор бодож олоогүй л байна. Цаас үлддэггүй байсан бол би ч бас эргэлзэх байлаа. Тэгтэл энэ машины цаас нь, зураг нь үлддэг" гэлээ. 

УИХ дахь АН-ын бүлгийн дэд дарга Ш.Түвдэндорж "Өнөөдрийн бүлгийн хурлаар Ерөнхий сайдын мэдээлэл, УИХ-ын даргын мэдээллийг сонслоо. Мөн сонгуулийн санал тоолох машин ашиглан санал авах, тоолох дүн гарах үйл явцын талаарх мэдээллийг Сонгуулийн ерөнхий хорооноос хийлээ. 

МАН олон чухал хуулийг гацааж байгаад харамсч байна

Түүнчлэн махны үнийн асуудлыг хэлэлцлээ. Хөдөөд дэлхийн зах зээлтэй ойролцоо, боломжийн үнэтэй байх зохицуулалт хийх арга хэмжээг зохион байгуулж төлөвлөгөө боловсруулж оруулж ирэхийг Засгийн газарт даалгалаа. 

Өнгөрсөн долоо хоногт МАН-ын бүлэг олон хуулийн төслийн хэлэлцүүлгээр завсарлага авсан. Манай намын бүлэг “УИХ ажлаа хийх хэрэгтэй” гэсэн байр суурьтай байгаа. Гэвч МАН олон чухал хуулийг гацааж байгаад харамсч байна. Зөвхөн Сонгуулийн хууль болон хар машинаас болоод бусад ажлыг гацааж  байгаа нь цэвэр улс төр гэж үзэж байгаа. МАН-аас гурван шаардлага тавьж байгаа. Сонгуулийн тойргийг жижигсгэх, сонгуулийн саналыг гараар тоолох, хэсгийн хороонд нам, эвслийн төлөөллийг оруулах саналтай байгаа. Энэ нь өмнөх сонгуулийн будлиануудыг эргэн сэргээх гэсэн санаархал гэж үзэж байна. 2008 оны долоодугаар сарын 1-нд юу болсныг ард түмэн мартаагүй. Тийм учраас сонгуулийн хуулийг хэлэлцэх боломжгүй. Харин Улс төрийн намуудын тухай хууль маш чухал. 
Мэдээллийн дараа АН болон бүлгийн удирдлага сэтгүүлчдийн асуултад хариулав. 

-Ипотекийн зээлийн асуудал өнгөрсөн долоо хоногт иргэдийн анхаарлыг ихээр татлаа. Хууль өргөн барьж энэ асуудлыг шийдэх тухай мэдэгдсэн. Хуулийн төслийг хэзээ, хаанаас өргөн барих вэ?

Ш.Түвдэндорж: -Үндсэн хуулийн цэцийн шийдвэр гарсан болохоор үүний араас ямар нэг тайлбар хийх нь зохимжгүй. Яагаад гэвэл эцсийн шийдвэр гарчихсан. Үндсэн хуулийн хүрээнд ямар боломж байгааг олж харсан хуулийн төслийг боловсруулахаар УИХ-ын гишүүн Д.Ганбатаар ахлуулсан ажлын хэсэг ажиллаж байгаа. 

-Улс төрийн намуудын тухай хуулийг С.Баярцогт гишүүн өргөн барих ёстой. Одоо өргөн баригдаагүй хуулийн төсөлд хүлээлт үүсгэх нь хэр зохистой вэ?

Ш.Түвдэндорж: -Хуулийн төслийг аль нэг нам эвслээс өргөн барих нь зохимжгүй гэж үзээд Ерөнхийлөгч өргөн барихад бэлэн болсон байгаа. Хуулийн төслийг даруй өргөн баривал хэлэлцэхэд бэлэн байгаагаа УИХ-ын дарга илэрхийлсэн байгаа. 

-Ерөнхий сайд өнөөдрийн мэдээлэлдээ Шадар сайдын асуудлаар мэдээлэл хийсэн үү, бүлгийн гишүүд ямар байр суурьтай байгаа вэ?

Ш.Түвдэндорж: -Энэ нь Үндсэн хуулиар олгогдсон Ерөнхий сайдын өөрийнх нь бүрэн эрхийн асуудал. Энэ талаар бүлгийн хурал дээр яриагүй.