"Санал тоолох процессыг шилэн болгох шаардлагатай"

УИХ-ын Сонгуулийн тухай хуульд өөрчлөлт оруулахыг шаардаж улс төрийн 22 нам жагсаал зохион байгуулснаас хойш Хэлмэгдэгсдийн хөшөөний дэргэд өнөөдөр тав дахь өдрөө суулт хийж байна. 

Суултыг улс төрийн намууд өдөр бүрээр хариуцан ажиллаж, УИХ Сонгуулийн тухай хуульд өөрчлөлт оруулахыг дэмжсэн иргэдийн гарын үсгийг цуглуулж байгаа ажээ.

Өнөөдөр суултыг зохион байгуулж байгаа Хан-Уул дүүрэг дэх МАН болон Хөгжлийн хөтөлбөр намын гишүүдийн байр суурийг хүргэж байна.

Хан-Уул дүүрэг дэх МАН-ын хорооны дэд дарга Б.Цэрэн

Гэрэл зургийг mpa.mn

"Улс төрийн суулт өнөөдөр тав дахь өдрөө үргэлжилж байна. Сонгуулийн дүн бодит биш байна. Тиймээс сонгуулийн дүнг бодит, ил тод болгоё. Гадаадын өндөр үнэтэй хар машинаар санал тоолж байгаад ард түмэн итгэхгүй байгаа. Өнгөрсөн 2012 оны сонгуулиар хар машин маш олон харыг дагуулсан. Тиймээс саналаа гараар тоолъё. Саналаа баталгаажуулъя. Санал тоолох процессыг шилэн болгох шаардлагатай. Энэ шаардлагыг АН-аас бусад бүх нам дэмжиж байгаа.

Санал тоолох процессыг шилэн болгох шаардлагатай.

Маш олон хүн ирж санал бодлоо хэлж, УИХ Сонгуулийн тухай хуульд өөрчлөлт оруулахыг дэмжин гарын үсэг зурж байна. Өнөө өглөөнөөс хойш гэхэд л 1,000 гаруй хүн ирж гарын үсэг зурсан. Цаашдаа энэ тэмцэл суулт маань бүх аймаг, дүүргүүдэд салбарлаж ард түмний санал авах ажил үргэлжилнэ"

Хөгжлийн хөтөлбөр намын ЕНБД Д.Хишигдэлгэр

Гэрэл зургийг mpa.mn

"Улс төрийн 22 нам нийлж Сонгуулийн хуульд нэмэлт өөрчлөлт оруулах хуулийн төслийг УИХ-д өргөн барьсан байгаа. Бидний зүгээс найман өөрчлөлтийг оруулахаар санал нэгдсэн. Түүний нэг нь сонгуулийн хар машинаас татгалзах юм. Хар машинаар сонгуулийн санал хураалт зохион байгуулах нь анхнаасаа ойлгомжтой луйвар байсан. 

Улс орны маань хөгжил урвуу тогтолцоотой болчихсон байна. Улс орны хөгжил хүн рүүгээ чиглэсэн байх ёстой. Тиймээс залуучуудаа иргэний зоригтой байгаарай, ахмадуудаасаа суралцаж, эв нэгдэлтэй байцгаая аа гэж уриалмаар байна"

Хан-Уул дүүрэг дэх МАН-ын хорооны тэргүүлэгч Г.Батсайхан

Гэрэл зургийг mpa.mn

"Бид 2012 оны сонгуулийн дараа ямар үр дүнд хүрсэн бэ гэдгийг сануулах зорилгоор өнөөдрийн арга хэмжээг зохион байгуулж байгаа. Энэ хар машинаас салахгүй бол Монгол Улсын хөгжилд ноцтой хор хохирол учрах нь тодорхой болоод байна.

Өнөөдөр Монгол Улс зорилгогүй, стратеги төлөвлөгөөгүй яваад байна. Нэг ядуу хүн туслах, замын уулзвар засах бол зорилго биш. Зорилгогүй учраас улс орны нийгэм эдийн засгийн байдал улам доройтож байгаа. Тиймээс эхний ээлжинд сонгуулиа шударга явуулах зорилгыг тавьж байна. 

2012 оны сонгуулийн дараа нэг ч санал аваагүй нэр дэвшигч хэлж байсан "Энэ ямар сонин юм бэ, манай эхнэр, ах дүү, би өрөө саналаа өгчхөөд байхад яагаад нэг ч санал байхгүй байгаа юм бэ" гэж. Ийм учраас саналаа гараар тоолъё гээд байгаа юм"

Гэрэл зургийг mpa.mn