Спортын төв ордны барилгыг шинэчилнэ

Эрүүл мэнд спортын Дэд сайд Т.Болдбаатар Спортын төв ордонг шинэчлэн барих санамж бичигт гарын үсэг зурлаа.

Спортын төв ордон нь 1958 онд БНХАУ-ын тусламжаар баригдаж ашиглалтанд орсон. Нийт талбайн хэмжээ 8165 м.кв, тэмцээн явуулах 1, бэлтгэлийн долоон заал, албан тасалгаа бүхий 7700 м.кв ашигтай талбайтай.

Тус ордонд жилд улсын болон олон улс, тив, дэлхийн 140 тэмцээн зохион байгуулагддаг байна.

Түүнчлэн тус төвийн байранд спортын дунд сургууль үйл ажиллагаагаа явуулдаг.

Монгол улсад цорын ганц Спортын төв ордонд Эрүүл мэнд, спортын яамны харьяа Спортын бэлтгэлийн төв болон Жудо бөхийн холбоо, Чөлөөт бөхийн холбоо, Боксын холбоо, Хүндийн өргөлтийн холбоо, Гимнастикийн холбоо, Оюутны спортын холбоо,Паралимпийн хороо гэх төрийн бус байгууллагууд байрлан үйл ажиллагаагаа явуулж байна. 

Спортын төв ордны барилгыг ашиглах боломжгүй гэсэн дүгнэлтийг Мэргэжлийн хяналтын байгууллагаас хоёр удаа гаргасан ч Үндэсний шигшээ багийн бэлтгэл дасгалжуулалт хийдэг үндсэн бааз болох тус барилгыг өнөөг хүртэл ашиглаж буй. 

Монголын үе үеийн алдарт тамирчдын хоёр дахь гэр болсон энэхүү ордонг шинэчлэн барих асуудалд төрийн зүгээс анхаарал хандуулж “Буянт-Ухаа” спортын ордонг барьсан БНХАУ-ын төрийн өмчит “Шанхай констракшн” компанитай санамж бичигт гарын үсэг зурах үйл ажиллагаа боллоо.

Шинэчлэгдэх Спортын төв ордон нь

• 50 м усан бассейн
• 2500 хүний суудалтай спорт
• Урлагийн төв заал
• 1000 хүний суудалтай туслах заал
• Үндэсний шигшээ баг болон өсвөрийн тамирчдын бэлтгэл, дасгалжуулалт хийх зориулалт бүхий бэлтгэлийн 30 гаруй заал
• Тамирчдад үйлчилгээ үзүүлэх спортын эмнэлэг
• Бэлтгэл дасгалжуулалтанд хяналт тавих лабратори
• Спортын сургууль, албан тасалгаа, зочид буудал бүхий цогцолбор байхаар төлөвлөжээ.