Наадмын үеэр уралдааны мориноос унаж гэмтсэн найман хүүхэд ГССҮТ-өөс тусламж үйлчилгээ авчээ

Гэрэл зургийг MPA агентлагийн онцгой зөвшөөрөлтэйгөөр ашиглав

Үндэсний их баяр наадмын амралтын өдрүүд буюу 2025 оны долоодугаар сарын 10-17-ны хооронд Гэмтэл Согог Судлалын Үндэсний Төв/ГССҮТ/ болон салбар эмнэлгийн Яаралтай тусламжийн тасагт нийт 4,093 хүн тусламж үйлчилгээ авчээ. Үүнээс насанд хүрэгсэд 2,514, 0-18 насны хүүхэд 1,579 байв.

Төв болон салбар эмнэлэгт нийт 123 үйлчлүүлэгчид яаралтай мэс засал, 119 үйлчлүүлэгчид төлөвлөгөөт мэс заслын тусламж үйлчилгээ үзүүлсэн байна.

Дээрх өдрүүдэд ГССҮТ-ийн алсын дуудлагын баг Сэлэнгэ, Хөвсгөл, Булган аймагт ажилласан бөгөөд орон нутагт осолдож, гэмтсэн иргэдэд шаардлагатай тусламж үйлчилгээг цаг алдалгүй шуурхай үзүүлжээ.

Тухайлбал долоодугаар энэ сарын 16-ны өдөр “Торгоны зам” (SILK WAY RALLY-SWR) авто ралли олон улсын уралдаанд оролцох үеэр гэмтсэн нэг тамирчныг Төв аймгаас нисдэг тэргээр тээвэрлэн авчирч, ГССҮТ-д тусламж үйлчилгээ үзүүлсэн байна.

Зам тээврийн ослын улмаас нийт 668 хүн яаралтай тусламж авснаас насанд хүрэгсэд 364, 0-18 насны хүүхэд 304 байв.

Мориноос унаж гэмтсэн тохиолдол нийт 111 байгаагаас 0-9 насны хүүхэд 12, 10-18 насны хүүхэд 48 байсан бол уралдааны мориноос унаж гэмтсэн найман хүүхэд байна.

Ахуйн орчинд гэмтэж бэртсэн нийт 1,307 хүн яаралтай тусламж үйлчилгээ авснаас 530 нь 0-18 насны хүүхэд.

Гэмтэл согог судлалын үндэсний төв болон "Eejii.org" сангийн хамтын ажиллагааны хүрээнд сайн дурын 52 ажилтан Яаралтай тусламжийн тасаг, Амбулаторийн тасагт тодорхой хуваарийн ажиллаж, наадмын өдрүүдэд сайн дурын долоон ажилтан өдөр оройн ээлжид хөтөч, зөвлөн туслагчаар ажиллалаа гэж ГССҮТ-өөс мэдээллээ.