"Автобусны буудлыг карман зогсоолгүй болгосон зам дагуух борооны ус зайлуулах зургаан шүүрт худгийг шилжүүлж байгаа"
Нийслэл хотын Энхтайвны өргөн чөлөө буюу Саппорогоос Офицеруудын ордон хүртэлх авто замыг хажуугийн зогсоолгүй болгоод буй.
Ингэхдээ автобусны 22 буудлын зогсоолд явган хүний зам тавих бол автомашины зогсоолыг ногоон байгууламж болгож тохижуулна гэж албаны хүн мэдээлсэн юм.
Харин эдгээр хажуугийн зогсоолын заримд нь борооны ус зайлуулах шугамын шүүрт худаг байгаа аж.
Энэхүү шүүрт худгуудыг хэрхэх тухайд Нийслэлийн Замын Хөгжлийн Газраас тодруулахад "Автобусны буудлыг карман зогсоолгүй болгосон авто зам дагуу борооны ус зайлуулах зургаан шүүрт худаг бий. Шүүрт худгуудыг шилжүүлэх ажлыг гүйцэтгэж байна.
Таван шүүрт худгийг шилжүүлсэн, үлдсэн нэгийг шилжүүлэх ажил үргэлжилж байна" гэлээ.
Хотын дарга Х.Нямбаатар "Дэлхийн бусад хотууд автобусны халаас зогсоолгүй байдаг. Тухайлбал Бээжин хот. Энхтайвны өргөн чөлөөг энэ жишгээр өөрчилж байгаа болно" хэмээн тайлбарлав.
Саппорогоос Офицеруудын ордон хүртэлх автобусны 22 буудлыг хажуугийн зогсоолгүй болгосон бөгөөд өнөөдрийн байдлаар явган хүний зам тавих ажил 25 дугаар эмийн сан, Ленин клубийн урд талд үргэлжилсээр байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
