"Очир" зөвлөл: Тогтсон хугацаанд хариу өгөхгүй бол лигийн тоглолтыг тодорхойгүй хугацаагаар хойшлуулах, цаашилбал цуцлах арга хэмжээ авна
Монголын Хөлбөмбөгийн Холбоо (МХБХ)-ны ээлжит бус хурлаар УИХ-ын гишүүн асан Ц.Анандбазар тэргүүнээр сонгогдсон. Түүнийг Монголын Хөлбөмбөгийн Тоглогчдын Холбоо (MFPA) болон "Очир" зөвлөл, шүүгч, тэмцээн зохион байгуулагч, Техникийн хэлтсийнхэн эсэргүүцэж, шат дараатай алхмууд хийж эхэлсэн билээ.
Сонгуулийн дараа "Очир" зөвлөл болон MFPA зэрэг бусад төлөөллүүд хуралдаж, лигийн тоглолтыг тодорхойгүй хугацаагаар хойшлуулж, Ц.Анандбазарыг огцруулах, дүрмийн шинэчлэл хийх, ээлжит бус их хурлыг зарлах гурван шаардлагыг МХБХ-д хүргүүлсэн юм.
Тэгвэл өнгөрсөн хугацаанд ямар нэг албан хариу аваагүй тул "Очир" зөвлөлийнхөн дахин хуралдав.
Тэд өмнөх шаардлагаа илүү тодорхой болгосон байна. Тухайлбал
- "МХБХ-ны дүрмийг шинэчлэхэд Тоглогчдын Холбоо, эмэгтэйчүүд, футзалын тамирчид, "Очир" зөвлөлийн гишүүдээс оролцуулсан Ажлын хэсгийг байгуулан ажиллуулах шаардлагатай гэж үзсүгэй.
- МХБХ-ны Их Хурлын 35 гишүүн байгууллага, клубийн зүгээс тавьсан албан ёсны бичгийн дагуу Ээлжит бус их хурлыг дахин зарлан хуралдуулж, шинэчлэн боловсруулсан дүрмийг батлахыг дэмжсүгэй.
- Энэ хүсэлт шаардлагын хариуг ажлын 3 хоног буюу 2025 оны тавдугаар сарын 7-ны өдрийн 17:00 цагаас өмнө албан бичгээр өгөхийг шаардсугай.
- Тогтсон хугацаанд хариу өгөхгүй бол Дээд лиг болон Нэгдүгээр лигийн тоглолтыг тодорхойгүй хугацаагаар үргэлжлүүлэн зогсоох, цаашилбал цуцлах арга хэмжээ авахаа мэдэгдсүгэй.
- МХБХ-нд үүсээд байгаа асуудлаар тамирчид болон хөлбөмбөгийн зүтгэлтнүүдийг хууль, цагдаагийн байгууллагаар шалгуулж байгаа үйлдлээ нэн даруй зогсоохыг шаардсугай" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
10 СЭТГЭГДЭЛТЭЙ
|
