Өмнөд Солонгосын экс ерөнхийлөгчийн гэр бүл өргөөнөөсөө нүүхээс өмнө асар их ус хэрэглэсний учир олдоогүй байна

Хууль бус арга замаар цэргийн дэглэм зарласан шийдвэртэй нь холбогдуулан Өмнөд Солонгосын ерөнхийлөгч Юн Сүк Ёлыг тус улсын үндсэн хуулийн шүүх дөрөвдүгээр сарын 4-ний өдөр огцруулсан билээ.

Үүнээс хойш яг долоо хоногийн дараа тэр гэр бүлийн хамт ерөнхийлөгчийн албан өргөөнөөс хувийн орон сууцандаа нүүсэн юм.

Гэтэл албан өргөөнд амьдарсан сүүлчийн долоо хоногийн хугацаанд Юн Сүк Ёлын гэр бүл 228 тонн гаруй ус хэрэглэсэн нь олны анхаарлын төвд орсон байна.

Юн Сүк Ёл болон түүний гэргий Ким Кон Хэ нар хүүхэдгүй хүмүүс юм. Харин олон тооны нохой, муур тэжээдэг.

Ардчилсан Намын хууль тогтоогч Ким Юн Ван энэхүү тоо баримтыг Сөүлийн Усны Хэрэг Эрхлэх Газраас олж авснаа өнгөрсөн долоо хоногт анх олон нийтэд дэлгэсэн юм.

Уг мэдээлэлд дурдсанаар бол Юн Сүк Ёлын гэр бүл нүүхээсээ өмнөх нэг долоо хоногийн хугацаанд буюу дөрөвдүгээр сарын 4-нөөс 10-ны хооронд 228.36 тонн ус хэрэглэсэн байна.

2023 оны албан ёсны тоо баримтаас үзвэл хоёр ам бүлтэй айл өрхийн нэг долоо хоногийн усны дундаж хэрэглээ Сөүл хотод гурван тонн орчим байжээ.

Гэтэл ерөнхийлөгч асны гэр бүл үүнээс 75 дахин их ус хэрэглэсэн нь анхаарал татахгүй байхын аргагүй юм байна.

Ерөнхийлөгчийн албан өргөөний үйл ажиллагааг хариуцдаг ажилтнууд ийм их усыг ямар зорилгоор ашигласныг тайлбарлаж чадахгүй байгаа гэнэ.

Хэдийгээр өргөөнд олон тооны хамгаалалтын болон үйлчилгээний ажилтнууд байрладаг, усан сан ажилладаг, ногоон байгууламжийг услах хэрэгцээ байдаг ч ердийн үеийн долоо хоногийн хэрэглээ 25-32 тоннд хэлбэлздэг байжээ.

Хууль тогтоогч Ким Юн Ван ерөнхийлөгчийн гэр бүлийн усны хэрэглээний талаар дэлгэрэнгүй мэдээлэл авахаар холбогдох албаныханд хандсан ч амжилт олоогүй гэнэ.

Тиймээс тэр шинэ ерөнхийлөгч сонгогдож, засаглал солигдсоны дараа илүү мэдээлэл авах боломжтой болно гэдэгт найдаж байгаа юм байна.

Эх сурвалж: Korea Times