Украинтай шууд яриа хэлэлцээ эхлүүлэх болон дахин гал зогсооход бэлэн байгаагаа Путин илэрхийлэв

Украины эрх баригчидтай шууд яриа хэлэлцээ эхлүүлэх болон фронтын шугам дээр дахин гал зогсооход бэлэн байгаагаа ОХУ-ын ерөнхийлөгч Владимир Путин өчигдөр мэдэгджээ.

Өнгөрсөн Ням гарагт тэр бүтэн нэг хоног гал зогсоох шийдвэр гаргасан ч Оросын арми үүнийг нь олон удаа зөрчсөн тухай Украины тал мэдээлж байв. Оросын тал ч бас Украиныг гал зогсоох тохиролцоог зөрчсөнд буруутгасан юм.

Украины ерөнхийлөгч Володимир Зеленский улаан өндөгний баярын 30 цагийн хугацаатай завсарлагыг иргэний байгууламжуудын эсрэг довтолгоог хориглох 30 хоногийн завсарлага болгон өргөжүүлэх саналыг хариу тавьж байлаа.

Гэвч Оросын тал Даваа гарагийн өглөө дайнаа үргэлжлүүлсэн юм.

Өчигдөр Оросын телевизээр ярихдаа Путин энхийн гэрээ байгуулах ямар ч санаачилгад Москва бэлэн байгааг илэрхийлээд Украины тал үүнийг нь хүлээж авна гэдэгт найдаж байгаагаа мэдэгджээ.

Зеленский өчигдөр Украины төлөөлөгчид Өрнөдийн холбоотнуудтайгаа уулзахаар Лондон хотыг зорьсон тухай сошиал хуудсаараа мэдээлэхдээ Путиний саналын талаар дурдаагүй байна.

“Украин, Их Британи, Франц, АНУ. Бид өмнөх шигээ аль болох бүтээлч яриа хэлэлцээ өрнүүлж, ямар нэг болзолгүйгээр гал зогсоох, дараа нь бодитой, бат бэх энх тайван тогтоохын төлөө ажиллахад бэлэн байна” гэж тэр бичжээ.

Лондоны уулзалт нь өнгөрсөн долоо хоногийн сүүлээр Парист болсон уулзалтын үргэлжлэл юм.

Өчигдөр өглөө Зеленский зэвсэгт хүчиндээ Оросын талын үйлдлийг дагах тушаал өгснөө мэдээлсэн юм.

“Украины армийн үйлдэл тэгш хэмтэй хэвээр байх болно. Гал зогсоовол бид галаа зогсооно. Оросууд довтолбол бид хамгаална. Үйлдэл үргэлж үгнээс хүчтэй байдаг” гэж тэр сошиал хуудсандаа бичсэн байна.

Өнгөрсөн долоо хоногийн сүүлээр ерөнхийлөгч Трамп болон төрийн нарийн бичгийн дарга Марко Рубио нар ойрын өдрүүдэд дайн дуусгах яриа хэлэлцээнд Оросын талаас ямар нэг ахиц дэвшил гаргахгүй бол АНУ зуучлагчийн үүргээсээ татгалзахад бэлэн байгааг сануулсан юм.

Энэ талаар сэтгүүлчид өчигдөр Кремлийн хэвлэлийн төлөөлөгч Дмитрий Песковоос асуухад “Ерөнхийлөгч Путин болон Оросын тал энх тайван тогтоох асуудалд нээлттэй хэвээр байгаа. Бид Америкийн талтай үргэлжлүүлэн ажиллаж, үр дүнд хүрнэ гэдэгт найдаж байна” гэж хариулжээ.

Эх сурвалж: Reuters