Иргэн Ц.Лут-Очир: Эх орноосоо урвасан Л.Гантөмөр, Ц.Туваан нарыг огцруулахыг шаардаж байна

Гэрэл зургийг MPA агентлагийн онцгой зөвшөөрөлтэйгөөр ашиглав

Засгийн газраас “Монгол Улсад агаарын хөлгийн түлш нийлүүлэх тухай Монгол Улсын Засгийн газар болон Оросын Холбооны Улсын Засгийн газар хоорондын хэлэлцээр”-ийн төслийг хэлэлцэж байгаа билээ. Үүнийг эсэргүүцэж иргэн Ц.Лут-Очир өнөөдөр мэдээлэл хийлээ.

Уг гэрээгээр 20 жилийн хугацаатай хэлэлцээрт ОХУ-тай хамтарсан компани "Чингис хаан" олон улсын нисэх буудлын дэд бүтцийг удирдах болон ашиглах асуудлыг хариуцах тухай заажээ. Хамтарсан компанийн 60 хувь нь Монголынх, 40 хувийг Оросууд эзэмших аж. Монголын талаас "Эрчис ойл" ХХК, Оросын талаас НК Роснефть компаниуд энэхүү хамтралд багтана.

Тэгвэл иргэн Ц.Лут-Очир "Засгийн газраас өнөөдөр Улсын Их Хурал (УИХ) руу өргөн барьж байгаа хэлэлцээрүүд Монгол Улсын эрх ашигт нийцэхгүй байна. Энэ асуудлаар олон нийтийг уриалсан, үзэл бодлоо илэрхийлэх зорилгоор жагсаал хийж байна.

Ялангуяа олон улсад гарах цорын ганц гарц болох онгоцны буудлынхаа түлшний хангамжийг ОХУ-ын "НК Роснефть"-тэй хамтарсан компанид өгч, 20 жилээр гэрээ хийж байгаа нь манай улсын эрх ашиг биш. Тиймээс энэ гэрээг гардан гүйцэтгэж байгаа Л.Гантөмөр, Ц.Туваан сайд нарыг яаралтай огцор гэж шаардаж байна.

Мөн Европ-Азийн гэрээнд манай улс хамаарахгүй. Энэ бол ОХУ болон тэднийг дагадаг таван улсад л хамаардаг гэрээ. Монголыг энэ гэрээнд оруулах сонирхол Орост бий. Энэ бол манай улсыг олон улсын гэрээнээс тусгаарлаж, өөрсдийн нөлөөнд оруулах гэсэн алхам гэж харж байгаа.

Тэдэнтэй чөлөөт худалдааны гэрээг хийснээр манай улсын жижиг дунд үйлдвэрлэл эрхлэгчид болон хүнс үйлдвэрлэгчид дампуурах эрсдэлтэй. 

Эх орноосоо урвасан Л.Гантөмөр, Ц.Туваан сайд нарыг яаралтай горимоор огцруулах, хэрвээ Засгийн газар дээрх гэрээнд гарын үсэг зурахыг дэмжвэл улсаа хохироосон зүйл болно.

Тиймээс ийм гэрээг батлахгүй байхыг УИХ-ын гишүүдэд уриалж байна" гэв.