Гэрэл зургийг MPA агентлагийн онцгой зөвшөөрөлтэйгөөр ашиглав

"Миний дэлгүүр"-т гарсан галыг унтраахаар ажиллаж байхдаа амиа алдсан Нийслэлийн гал унтраах, аврах 10 дугаар ангийн тасгийн дарга Д.Жанчив агсны ар гэрийнхэн өнөөдөр мэдээлэл өглөө. 

Амь насаа алдсан алба хаагчийн гэргий "Миний хань өргөсөн тангарагтаа үнэнч байж, аливаа гал руу хамгийн түрүүнд ордог ажилд 25 жил ажилласан. Энэ хугацаандаа 7,000 гаруй хүний амь насыг аварсан байна. Тэдгээрийн ард маш олон гэр бүл элэг бүтэн амьдарсан. 

Бүтэн нэг жил төр болон Онцгой байдлын албыг хангалттай удаан хүлээсний дараах зүйлсийг асуумаар байна. 

Онцгой байдлын алба хаагчдын хувцас, хангамж хэрэгсэл хүний амь аврах уу? Ард түмнийг аврагч аварч байгаа бол аврагчийг хувцас, хангамж хэрэгсэл нь л хамгаална. Шарах шүүгээнээс халуун поднус авах гэж хэдэн давхар бээлий өмсдөг билээ. Гэтэл тэр улаан гал руу аврагч хүн ямар хувцас хангамж хэрэгсэлтэй ордог юм бэ? Одоо сайжирсан ч өмнө нь яагаад засаж болоогүй юм бэ. 

Японы аврагчийн малгай гэхэд шилээ буулгахад л дулаан ялгаруулагчаар хүн хаана байгаа мэддэг, дотроо холбоо станцтай байх жишээтэй. Гэтэл манай гал сөнөөгчид хав харанхуй утаан дунд хамгийн ойр байх юмаа нүдэж чимээ гарган хоорондоо харилцаж байна. Яагаад одоо болтол холбоо станц байхгүй байгаа юм бэ? Тэр байсан бол миний хань амьд ч байж болох байсан болов уу. Өнөөдөр авчирсан энэ хувцас бол миний ханийн хуучин хувцас нь юм. Байнга урагддаг учраас оёос ихтэй байгаа. Сэтгүүлч нарт сайхан л юм харуулдаг байх. Бодит байдал нь энэ шүү. Ийм л өрөвдөлтэй юм өмсөж байсан. 

Энэ малгай зүгээр нэг пункэр шатахад л ийм болсон. Гэтэл 400 градуст тэсвэртэй гээд л яриад байгаа юм. Би аливаа байгууллагын мууг үзэх гээд байгаа юм биш. Зүгээр л хүмүүсийнхээ эрх ашгийг нэгдүгээрт тавих хэрэгтэй байна гэдгийг л хэлмээр байна. 

"Баатар цол гэдэг гэр бүл, үр хүүхдийнх нь хувьд үнэ цэнтэй зүйл шүү дээ..."

Дайн байлдаангүй энэ үед эх орныхоо төлөө нас барж буй хүмүүс нь онцгой байдал, цэрэг, цагдаагийн алба хаагч нар л байна. Тэдгээр хүмүүст баатар цолыг нь нөхөж олгож болдоггүй юм уу. Хэдийгээр зүгээр төмөр ч гэсэн гэр бүл, үр хүүхдийнх нь хувьд үнэ цэнтэй зүйл шүү дээ. Ганц манай гэр бүл ч гэлтгүй баатруудаа алдсан олон гэр бүлийн өмнөөс энэ үгийг хэлж байгаа юм шүү. Дарга нар нь шагнал аваад л байдаг. Хариуцлага ярих болохоор тэр шагнал аваад байдаг дарга нар нь байдаггүй шүү дээ. 

Заавал олны анхаарлын дунд өнгөрөх ёстой байсан юм уу?

Монгол Улсын ерөнхийлөгчийн санаачилгаар Дүнжингаравын дэлбэрэлтийн үед нас барсан алба хаагчийн ар гэрт буцалтгүй тусламж үзүүлсэн. Гэтэл яагаад манай гэр бүл, үр хүүхдүүдэд ялгавартай хандаж байгаа юм бэ? Энэ алба хаагчийн ард таван хүүхэд үлдчихээд байхад төр яагаад үүргээ биелүүлэхгүй байгаа юм бэ? Заавал олны анхаарлын дунд өнгөрөх ёстой байсан юм уу?" гэв. 

Алба хаагчийг нас барсны дараа бүх шатны дарга нар ирээд "Тэтгэмжийг нь шийднэ. Таван хүүхдэд нь гэр орон сууцыг нь асуудалгүй бэлдчихнэ. Битгий санаа зов. Олон нийтийн хэрэгсэлд битгий ярилцлага өгөөрэй" гэж хэлж байсан байна. Гэтэл одоо болохгүй, бүтэхгүй байна гэсээр бүтэн жил өнгөрсөн байна гэдгийг ар гэрийнхэн нь онцлов.