"30-40 хүнтэй, иргэдэд үзүүлэх үйлчилгээгүй нийслэлийн харьяа зарим байгууллага, хэд хэдэн төслийн нэгжийг татан буулгана"

Гэрэл зургийг MPA агентлагийн онцгой зөвшөөрөлтэйгөөр ашиглав

Нийслэлийн харьяа зарим байгууллагыг татан буулгахаар болжээ. Цаашид хэд, хэдэн төслийн нэгжийг татан буулгах шийдэлд хүрчээ.

Энэ талаар хотын дарга Х.Нямбаатар "Нийслэлийн харьяа, босоо удирдлагатай хэдэн байгууллага бий. Үүнээс Нийслэлийн улсын бүртгэлийн газар, нийслэлийн Хүүхэд, гэр бүлийн хөгжил, хамгааллын газрыг татан буулгах хүсэлтийг Засгийн газрын хэрэг эрхлэх газарт өнөөдөр хүргүүлнэ. Эдгээр байгууллагын чиг үүргийг харьяа агентлагууд нь хэрэгжүүлж, дүүргүүдийг удирдлага, мэргэжил арга зүйгээр хангах бүрэн боломжтой.

Төрийн хэмнэлт ярьж байхад төр өөрөө чадварлаг, цомхон байх ёстой. Гэтэл 30-40 хүнтэй тодорхой чиг үүрэггүй, иргэдэд үзүүлэх үйлчилгээгүй байгууллагууд байна. Тухайлбал Нийслэлийн хүүхэд, гэр бүл, залуучууд хөгжлийн газарт 39 орчим ажилтантай. Харин дүүрэг бүрд Хүүхэд, гэр бүл, залуучууд хөгжлийн хэлтэстэй. Эдгээр хэлтэс нь хүүхдийн эрхийг хамгаалах болон хүүхдийн хүчирхийллийн эсрэг төрийн бодлогыг хэрэгжүүлнэ.

Нийслэлийн мэдээллийг дамжуулдаг төв шиг байгууллагууд байх шаардлагагүй.

Татан буулгасан байгууллагуудын хөрөнгө, эд хогшлыг хүлээж авах, тухайн агентлагт шилжүүлэх ажлыг НЗДТГ-ын дарга Д.Амгалан хариуцна.

Цаашид шинэ орон тоо, албан тушаал үүсгэхгүй. Хэд, хэдэн төслийн нэгжийг НИТХ-аар хэлэлцэж, татан буулгана" гэж мэдээллээ.

Нийслэлийн Засаг Даргын харьяанд 60 гаруй байгууллага байдаг аж.

Нийслэлийн Улсын бүртгэлийн газар, нийслэлийн Хүүхэд, гэр бүлийн хөгжил, хамгааллын газрыг тухайн хуулийн этгээдийг үүсгэн байгуулсан эрх бүхий байгууллагын шийдвэрээр татан буулгана. Татан буулгах үйл ажиллагаа эрх бүхий байгууллагын шийдвэр, журмын дагуу явагдана.

Тодруулбал Хуулийн этгээдийн улсын бүртгэлийн тухай хуулийн дагуу дараах дарааллаар татан буулгах үйл ажиллагааг зохион байгуулдаг. Үүнд,

23 дугаар зүйл. Хуулийн этгээдийг татан буулгасан тухай улсын бүртгэлийн байгууллагад мэдэгдэнэ.

24 дүгээр зүйл. Хуулийн этгээдийг татан буулгасныг улсын бүртгэлд бүртгүүлэхэд шаардах баримт бичгийг бүрдүүлнэ.

25 дугаар зүйл. Хуулийн этгээдийг татан буулгасныг бүртгэнэ.

26 дугаар зүйл. Хуулийн этгээдийг улсын бүртгэлээс хасах хуультай.