Ж.Сүхбаатар: "Daewoo"-г брэнд гэж ойлгосон. Д.Сумьяабазар бид хоёр талбайд гаргаж тавьсан 100 автобус доголдолтойг мэдээгүй

"Ногоон автобус" худалдан авах ажиллагаатай холбоотой А.Ганхуяг нарын 24 хүнд холбогдох хэргийн шүүх хуралдаан энэ оны хоёрдугаар сарын 24-нөөс эхэлж, өнөөдрийг хүртэл Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд үргэлжилж байна.

Тус хэрэгт Түгжрэлийг бууруулах үндэсний хорооны дарга, Монгол Улсын сайд асан Ж.Сүхбаатар яллагдагчаар татагдсан. Тэрбээр "ногоон автобус" худалдан авах үед ямар үйл явдал болсон талаар ийнхүү ярилаа. 

Сайд асан Ж.Сүхбаатар "Намайг буруутгаж буй нэг зүйл нь хотын дарга асан Д.Сумьяабазарын гэрчийн мэдүүлэг. Энд ердөө "Ж.Сүхбаатар сайд нийтийн тээврийн асуудлыг бүхэлд нь хариуцаж байсан" гэж ярьсныг эш татаад байгаа. Прокурор хүн хуульд захирагдах ёстой. Хууль зөвхөн шүүгдэгч хүнд үйлчлэхгүй. Д.Сумьяабазарын хэлсэн үг, Жавхлантбаатарт хууль бус үүрэг өгсөнтэй нотлогдож байна гээд холбоод байгаа. 

Мөрдөгч нар намайг ямар хэмжээний мэдээлэлтэй байсныг дүгнэх гэж оролдоод байна. Гэтэл хэрэгт авагдсан 2023 оны наймдугаар сарын 28-ны өдрийн Үндэсний хорооны хурлын протоколд би "евро 5 хөдөлгүүртэй байх юм байна. Нэмэлт шаардлагыг төрийн талаас тавиад байна. Хугацаа хойшилж байгаа учраас автобус орж ирэх үеэр нэгдүгээр эгнээг хэрхэн өргөтгөх вэ" талаар ярьсан. 

Хэрэгт дурдсанаар "шүүгдэгч Ж.Сүхбаатарын хувьд захиалсан автобус нийлүүлэлтийн хуваариас хоцорч ирсэн тул яаралтай хүлээн авч, нээлт хийх шаардлага үүссэн байна" гэсэн. Автобус нийлүүлж яаралтай парк шинэчлэл хийх ёстой гэдгийг одоогоос дөрвөн жилийн өмнө бүгд мэдэж байсан. Гэтэл би нээлт хийх гээд яараад байсан юм шиг яриад байна. Би тогтоогоод байгаа юм биш. Хууль тогтоогчид яаралтайг мэдээд аль эрт холбогдох хууль, Засгийн газрын тогтоолыг гаргачихсан. 

Надад юу үлдээд байгаа вэ гэвэл төсвийн ерөнхийлөн захирагчийн хувьд үйлчилгээнд хэзээ гаргах вэ гэдгийг нэхэж байгаа. Прокурор өчигдөр надад "та хашир хүн, хүлээн авахад нь оролцож болоогүй юм уу" гэж хэлсэн. Би А.Ганхуягтай гуравдугаар сарын 7-нд уулзахдаа "Хятад автобусанд чинь хулхи зүйл орж ирэх вий дээ, чанарт онцгой анхаараарай" гэсэн. Хүлээн авахад ингэж анхаарч байсан. 

Бид "Daewoo"-г брэнд гэж ойлгосон. Солонгосын чанарт эргэлзээгүй. Д.Сумьяабазар бид хоёр Монголын түүхэнд анх удаа хүлээж аваагүй байгаа 100 автобусыг Сүхбаатарын талбай дээр ил гаргаж тавьсан. Яагаад гэвэл бид хоёрын хооронд болсон яриа ердөө тэр. Янз бүрийн яриа гараад байна, "Daewoo" юм чинь няцаалтыг бодитоор өгье гэсэн. 

Д.Сумьяабазар бид хоёр есдүгээр сарын 28-н хүртэл автобус доголдолтой гэдгийг мэдээгүй болох нь Сүхбаатарын талбайд гаргаж тавьсан 100 автобуснаас харагдана. Зарим хүн хүлээж аваагүй зүйлээ гаргаж тавиад олон нийтийн хэл амны бай болгочихсон гээд шоолоод байгаа. 

Би хэзээ асуудал эвгүй болсныг мэдсэн бэ гэх цаг хугацаа хэрэгтэй. 2023 оны есдүгээр 29-нд хүмүүсээ явуулж, будаг замаск нь асуудалтай юм байна гэдгийг мэдсэн. Үүнээс өмнө А.Ганхуягаас асуухад "энэ чинь фотошоп шүү дээ" гэж хэлүүлээд хугацаа жаахан алдсан. 

Есдүгээр сарын 29-нд мэдэгдэл шаардлага гэх зүйлийг Тэнүүн-Огоо компани руу явуулсан. Аравдугаар сарын 2-нд ёс зүйн хувьд хариуцлагыг өөрөө хүлээх ёстой юм байна гээд ажлаасаа чөлөөлөгдсөн" гэж ярив.

ВИДЕО: