ДБНХ-ны Азийн зөвлөлийг Мохаммед Аль-Авамлех тэргүүлнэ

Дэлхийн Бөхийн Нэгдсэн Холбоо (ДБНХ)-ны Азийн Зөвлөлийн хурал өчигдөр болжээ. Уг хурлаар тус зөвлөлийн тэргүүн, гишүүнийг сонгосон байна. Сонгуульд шар тивийн 38 улс оролцжээ.

Зөвлөлийн долоон гишүүний дөрөв нь шинээр нэгдсэн. Тэд бол

• Мохаммед Аль-Авамлех (Йордан),
• Алиреза Дабир (Иран), 
• Лана Хдоур (Палестин),
• Санжай Синх (Энэтхэг) юм.

Харин хуучин гишүүдээс 

• Кеннет И (БНСУ),
• Мелис Турганбаев (Киргиз),
• Е Жан (БНХАУ) нар дахин сонгогджээ.

Улмаар Йорданы бөхийн холбооны тэргүүн Мохаммед Аль-Авамлех Зөвлөлийн ерөнхийлөгчөөр томилогдож, олимп (2000), дэлхийн (1998) аварга Ираны алдарт бөх Алиреза Дабир дэд ерөнхийлөгчөөр ажиллах болов.

Өмнөх дөрвөн жилд дэд ерөнхийлөгчийн албан тушаалыг хашсан БНСУ-ын Кеннет И дараагийн дөрвөн жил ерөнхий нарийн бичгийн даргаар ажиллах аж.

Сонирхуулахад энэ сарын 25-наас 30-ныг дуустал ДБНХ-ны Азийн Аварга Шалгаруулах Тэмцээн (ААШТ) Йорданы Амман хотод болох билээ.