Өмнөд Солонгост дэгдсэн ой хээрийн түймрийн улмаас хоёр хүний амь үрэгдэв
Өчигдөр буюу Бямба гарагт Өмнөд Солонгос улсад ой хээрийн түймэр гарсны улмаас одоогоор хоёр хүний амь үрэгдсэн нь тодорхой болоод байна.
Тус улсын зүүн өмнөд бүсийн Санчон дүүрэгт хоёр гал сөнөөгч амиа алдаж, өөр хоёр хүн сураггүй алга болсныг Ёнхап агентлаг мэдээлжээ.
Өчигдөр оройн 6:00 цагт Улсан хот, Умард болон Өмнөд Гёнсан мужуудыг хамарсан тус улсын зүүн өмнөд нутагт онц байдал зарлажээ.
Эрх баригчид Өмнөд Гёнсан мужийн Санчон дүүргийн нийт найман тосгоны 200 гаруй иргэдийг нүүлгэн шилжүүлэх шийдвэр гаргасан байна.
Өмнөд Солонгосын ерөнхийлөгчийн үүрэг гүйцэтгэгч Чой Сан Мок өчигдөр нар жаргахаас өмнө гал түймрийн тархалтыг зогсоох даалгавар өгсөн ч хүчтэй салхины улмаас биелэх боломжгүй болжээ.
Сүүлд Умард Гёнсан мужийн Уйсон дүүрэгт 400 гаруй хүнийг нүүлгэн шилжүүлэх шийдвэр гарсан юм.
Бусан болон Дэжон хотуудыг тойрсон 12 газарт гал түймрийн эрсдэл нэмэгдэж буйг эрх баригчид анхааруулжээ.
Ой хээрийн түймэр гарсан бүс нутаг нь нийслэл Сөүл хотоос зүүн өмнө зүгт 250 орчим километр зайтай оршдог юм.
Эх сурвалж: BBC
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
