Хятадын халуун тогооны ресторан “шээсний дуулиан”-ы дараа их хэмжээний нөхөн төлбөр олгох шийдвэр гаргав

Хятадын халуун тогооны рестораны хамгийн том сүлжээ Хайдилао өнгөрсөн сарын сүүлээр сошиал ертөнцөд тарсан дүрс бичлэгтэй холбоотой дуулианы улмаас Шанхай хотын нэг салбартаа үйлчлүүлсэн 4,000 гаруй хүний төлбөрийг буцаах шийдвэр гаргажээ.

Хэн үйлдсэн нь тодорхойгүй уг бичлэгт өсвөр насны хоёр залуу тус рестораны нэг салбарын ВИП өрөөнд үйлчлүүлж байхдаа тогоотой шөлөнд нь шээж байгааг харуулсан юм.

Тухайн үед согтуу байсан 17 настай хоёр залууг сүүлд цагдаа нар баривчилсан байна.

Үйлчлүүлэгчид тус тусдаа шөл хэрэглэдэг тул энэхүү үйл явдлын улмаас хэн нэгэн хохирсон гэх баримт байхгүй байгаа ч Хайдилао бүх үйлчлүүлэгчдээсээ уучлал гуйж, тухайн салбарын бүх тоног төхөөрөмж, хоолны хэрэгслийг сольж, ариутгал цэвэрлэгээний арга хэмжээ авснаа зарлажээ.

Дээрх үйл явдал хоёрдугаар сарын сүүлээр болсныг компанийн удирдлага хэдэн өдрийн дараа сошиал сүлжээнд тарсан бичлэгээс мэдсэн байна.

Дараа нь Шанхай хотын аль салбарт үйл явдал болсныг хайж олоход дахиад нэг долоо хоногийн хугацаа зарцуулжээ.

Уучлал гуйж, бүх зүйлээ шинэчилснээс гадна Хайдилао хоёрдугаар сарын 24-нөөс гуравдугаар сарын 8-ны хооронд тухайн салбарт үйлчлүүлсэн бүх хүмүүсийн төлбөрийг буцааж, бас төлбөрийг нь 10 дахин үржүүлсэнтэй тэнцэх мөнгө тараахаар болсон байна.

“Энэ үйл явдлын улмаас үйлчлүүлэгчдэдээ учруулсан хохирлыг ямар ч аргаар бүрэн барагдуулах боломжгүйг бид мэдэж байгаа ч хариуцлагаа хүлээхийн тулд чадах бүхнээ хийх болно” гэж Хайдилао компанийн мэдэгдэлд өгүүлжээ.

Сичуань мужийн Жианьян хотод анх нээгдэж байсан тус ресторан богино хугацаанд хурдтай өргөжиж, одоо дэлхий даяар 1,000 гаруй салбартай болсон юм.

Эх сурвалж: BBC