Юань гүрний үед хамаарах гурван ширхэг хүрэл толийг хууль бусаар улсын хилээр гаргах гэж байсныг илрүүлэв

ГЕГ

Монголын эзэнт гүрний тав дахь их хаан Хубилай хааны үе буюу 1268-1338 онд хамаарах түүх соёлын биет өв болох гурван ширхэг хүрэл толийг улсын хилээр хууль бусаар гаргах гэж байсныг илрүүлэн, хурааж авснаа Гаалийн Ерөнхий Газар(ГЕГ)-аас мэдээлэв. 

Сэлэнгэ аймаг дахь Гаалийн газрын Зөрчилтэй тэмцэх албаны Гаалийн улсын ахлах байцаагч Ж.Жамьянсэнгэ "2025 оны нэгдүгээр сард Оросын Холбооны Улс руу зорчиж байсан иргэдийн дундаас Монгол Улсын иргэн Э-гийн гар тээшинд нарийвчилсан үзлэг шалгалт хийхэд соёлын өв байж болзошгүй гурван эд өлгийн зүйл илэрсэн.

Эдгээрийг Соёлын өвийн газарт нягтлан шалгуулахаар илгээхэд XII-XIII зууны үед хамаарах зүйлс гэдэг нь шинжээчийн дүгнэлтээр тогтоогдсон. Иймд асуудлыг хуулийн байгууллагад шалгуулахаар ажиллаж байна" гэв.

Мөн Соёлын Өвийн Үндэсний Төвийн Авран хамгаалах, эрсдэлийн судалгааны газрын дарга Г.Анхсанаа "Тус гурван толь нь өөр өөрсдийн гэсэн онцлогтой дурсгалт зүйлүүд байсан. Тухайн үед олдсон хүрэл толь, хадгалалтын байдал зэргийг харгалзан шинжлээд Юань гүрний үед холбогдох түүх соёлын дурсгалт зүйл мөн байна гэж шинжилж тогтоосон" гэсэн юм.

Улсын хилээр түүх соёлын зүйлс хууль бусаар нэвтрүүлэхийг завдсан тохиолдолд

• Эрүүгийн хуульд зааснаар 10,000-40,000 нэгжтэй тэнцэх хэмжээний төгрөгөөр торгох, эсхүл 2-8 жил хүртэл хугацаагаар хорих
• Зөрчлийн тухай хуульд зааснаар эд зүйлийг хурааж хүнийг 100 нэгжтэй тэнцэх хэмжээний төгрөгөөр, хуулийн этгээдийг 1,000 нэгжтэй тэнцэх хэмжээний төгрөгөөр торгох шийтгэлтэй байдаг гэдгийг ГЕГ-аас анхаарууллаа.

 

 

 

 

Эх сурвалж: Гаалийн Ерөнхий Газар