Номхон далайн арал улсуудын гоо бүсгүй шалгаруулах тэмцээний эргэлзээтэй шүүлтийг мөрдөн шалгаж эхэлжээ
Өнгөрсөн долоо хоногийн сүүлээр Номхон далайн арал улсуудын гоо бүсгүй шалгаруулах тэмцээнд Самоа улсын оролцогч хоёр дахь жилдээ дараалан түрүүлсэн нь маргаан дэгдээжээ.
Тэмцээнийг зохион байгуулагч Соломоны арлууд улсын эрх баригчид шүүлтийг будилаантай болсон гэж үзээд гадаадаас ирсэн шүүгчдэд хилийн хориг тавьсан байна.
Өчигдөр үдээс хойш Соломоны тал уг хоригоо цуцалж, шүүгчдэд эх орондоо буцах боломж олгосон ч шүүлтийн үеэр гарсан шударга бус үйлдлийг үргэлжлүүлэн шалгахаа мэдэгджээ.
Хэргийн гол эзэн Самоа улсын шүүгч Мягмар гарагийн орой нутаг буцах гэж байхдаа Соломоны арлуудын нийслэл Хониара хотын нисэх буудалд саатуулагдсан юм.
Тэмцээнийг таван хүн шүүснээс Папуа Шинэ Гвиней, Тонга улсуудын хоёр шүүгч хилийн хориг тавихаас өмнө Соломоноос амжиж явсан байжээ.
Номхон далайн арлын улсууд Самоа улсын засгийн газрын санаачилгаар 1987 оноос эхлэн бүс нутгийн гоо бүсгүй шалгаруулах тэмцээнийг жил бүр зохион байгуулдаг болсон юм.
Хоёрдугаар сарын 8-ны орой болсон сүүлчийн шатны шалгаруулалтаар “Miss Pacific Islands” титмийг Самоа улсын оролцогч Литара Еремиа Аллан хүртсэн байна. Тэрбээр өчигдөр эх орондоо буцжээ.
Эх сурвалж: Reuters
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
Баярлалаа
|
15 СЭТГЭГДЭЛТЭЙ
|
