• 2 сарын 6, Пүрэв
|
Уншиж байна ...

Баянзүрх дүүрэгт бүртгэгдсэн менингококкт халдварын сэжигтэй тохиолдлын хариу СӨРӨГ гарлаа

М.Батчимэг, ikon.mn
1 цаг 43 минутын өмнө
IKON.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Баянзүрх дүүрэгт бүртгэгдсэн менингококкт халдварын сэжигтэй тохиолдлын хариу сөрөг гарсан талаар Халдварт Өвчин Судлалын Үндэсний Төв(ХӨСҮТ)-өөс мэдээллээ. 

Уг тохиолдлоос өмнө Баянгол дүүрэгт бүртгэгдээд байсан менингококкын сэжигтэй тохиолдлын хариу өчигдөр сөрөг гарсан юм. 

Арванхоёрдугаар сарын 5-нд анхны тохиолдол бүртгэгдсэний дараа 2,000 тун вакцин худалдан авсан. Ирэх долоо хоногт Монгол Улсад бууна. Батлагдсан тохиолдлын хавьтлууд болон эрсдэлт бүлгийн хүн амд тархвар зүйн заалтаараа вакцин хийнэ гэдгийг ХӨСҮТ-өөс мэдээлээд байгаа билээ. 

Зөвлөгөө: 

  • Бага насны хүүхдүүд эрсдэлт бүлэгт хамаарна. Хүний дархлааны систем болон хэр хоруу чанартай өвдөж байгаагаас хамаарч менингитийн халдвар эрчимтэй явна.
  • Бүх насныхан өвдөх эрсдэлтэй. Гэхдээ өмнөх тохиолдлуудаас ажиглахад тав хүртэлх насны хүүхдүүд илүү хүндээр өвдөж байна. 
  • Менингококкын халдварын гол онцлог нь өндөр халуурах шинж тэмдгээр илэрдэг. Халууны эм уулгаад түр буусан ч буцаад 39, 40 хэм хүртэл маш өндөр халуурдаг. 
  • Насанд хүрэгчид гаднаас халдварын нянг тээж, бага насны хүүхдүүдэд дамжуулах тохиолдол бий. Иймд томчууд гэртээ ороод гадуур хувцсаа тайлж, хоолой амаа зайлаад, ариун цэврээ сахисны дараа бага насны хүүхэдтэйгээ харьцахыг зөвлөе. 

Шинж тэмдэг: 

  • 38-42 хэм хүртэл гэнэт өндөр халуурах
  • Халууны эмэнд буухгүй байх
  • Богино хугацаанд дахин өндөр халуурах
  • Бие сулрах, дотор муухайрах
  • Бөөлжих, уур уцаартай хэт цочимхой эсвэл номой болох
  • Царай цонхийх зэрэг шинж тэмдэг илэрдэг.

Цусархаг тууралт нь өвчин эхэлснээс хойш 12 цагийн дотор гарна. Хэрэв өвчин хүнд явцтай байвал үхжилт тууралт 4-6 цагийн дотор гардаг. Маш богино хугацаанд хүндэрч, эндэгдэлд хүргэдэг байна.