Н.Ганбаа: Улаанбаатар хот гамшигтай тулчхаад байгаа учраас пассивын таван зарчмыг аливаа төслүүдэд хэрэгжүүлэх шаардлагатай

Гэрэл зургийг MPA агентлагийн онцгой зөвшөөрөлтэйгөөр ашиглав

Агаар орчны бохирдлыг бууруулах чиглэлээр судалж, шинэ технологи, туршлагуудыг нутагшуулж буй мэргэжилтнүүд өнөөдөр төрийн ордонд болж буй “Утааны асуудал: Зуух, түлшний технологийн шийдлүүд” сэдэвт хэлэлцүүлэгт оролцож байна. 

Тухайлбал “Пассив барилгын хүрээлэн”-гийн ерөнхийлөгч, Олон улсын Барилгын зөвлөх, сургагч багш Н.Ганбаа "Бидний тулалдаж буй "дайсан" бол дулааны алдагдлаас үүсэлтэйг зөвшөөрөх хэрэгтэй. Яндан, түлш нь муу учраас утаа гараад байгаа гэх биш юм. Үндсэн шалтгаан нь дулаан алдсан учраас бид ямар нэг юм түлээд байгаа. Яаж дулааны алдагдлыг яаж бууруулах вэ гэхээр дулаалж байгаад халаая буюу дахиад түлш рүүгээ орчихдог. Тэгвэл бүр сайн дулаалъя гэвэл пассив барилга гэх шийдэл гарч ирдэг" хэмээн илтгэлийнхээ эхэнд онцолж байлаа. 

Иймд тэрбээр өнөөдөр пассив барилгын зарчмуудыг танилцуулж, аливаа төсөл хэрэгжүүлэхдээ пассивын зарчмыг баримтлах шаардлагатай гэж байв.

“Пассив барилгын хүрээлэн”-гийн ерөнхийлөгч, Олон улсын Барилгын зөвлөх, сургагч багш Н.Ганбаа "Пассив барилгад таван зарчим бий.

Байшингаа зөв барьчихвал

• нэгдүгээрт үл хөдлөх хөрөнгийн үнэ өснө,
• хоёрдугаарт ая тухтай, эрүүл аюулгүй орчин бүрдэнэ,
• гуравдугаарт урсгал зардал зогсох тул ядуурал багасна. 

Хэн нэгэн тэнд түлш бэлдэх шаардлагагүй, хэн нэгэн байн байн очиж байшинг нь дулаалж өгөөд байх шаардлагагүй. Нэг сайн хийгээд март гэх арга юм.

 

• Зузаан дулаалга: Дулаан алдагдлыг бууруулахын тулд дулаалгын маш сайн материалуудыг жигд тархааж хийх ёстой.
• Пассив цонх: Энгийн цонх нь хоёр сантиметр хөөсөнцөртэй дүйх хэмжээнийх байдаг бол пассив цонх нь адилхан материал ашиглангаа аргачлалыг нь өөрчлөхөөр 10-аад сантиметр хөөсөнцөр дулаалгатай тэнцэхүйц дулаан хамгаалалтын чадвартай болдог. 
• Агаар сэлгэлт: Хаягдал дулааныг бүрэн дүүрэн ашигласнаараа эрчим хүчний зарцуулалтыг эрс бууруулна. 
• Битүүмжлэл: Монгол гэрт гал түлэхэд хананы завсраар сийгдэг. Амьсгалдаг гэр учраас тэр. Монгол гэрийг битүү болгоход дулаан алдагдал 20-30 хувь буурдаг. Агаар сэлгэлт битүүмжлэл хоёрын хослолоор байшингийн дулаан хамгаалалт нь 50 хувь сайжирдаг.
• Дулааны гүүргүй бүтэц: Дулааныг суурь, балконы хэсгээр алдаж байна. Ийм жижиг сажиг алдаанууд нийлсээр байгаад утаа үүсчхээд байгаа. 

Улаанбаатар хот гамшигтай тулчхаад байгаа учраас пассивын таван зарчмыг аливаа төслүүдэд хэрэгжүүлэх шаардлагатай. Дулаалгын нэмэлт зардлуудыг нь төрөөс дэмжээд өгвөл боломжтой" гэлээ.