Ж.Батболд: Монголын шахмал түлшний стандарт нь зохиомол учраас олон улсын шаардлагад нийцэхгүй байгаа
Агаарын бохирдол, утааны асуудлаар ерөнхий хяналтын сонсгол зохион байгуулах хүрээнд “Утааны асуудал: Зуух, түлшний технологийн шийдлүүд” сэдэвт хэлэлцүүлэг төрийн ордонд өнөөдөр болж байна.
Хэлэлцүүлгээс "Хүний эрүүл мэнд, байгаль орчинд ээлтэй шахмал түлшийг хэрхэн үйлдвэрлэдэг вэ, олон улсын стандартын тухай" сэдвээр танилцуулсан Монгол Улсын зөвлөх инженер Ж.Батболд илтгэлийг онцолъё.
Тэрбээр "Зуух чанартай чанаргүй, сайжруулсан сайжруулаагүй зэргээс үл хамаарч түүнд хэрэглэх түлш нь чухал юм. Монгол өрх гэрүүд өнөөдрийн байдлаар зуухтайгаа хэвээрээ тул түлш нь хүний эрүүл мэндэд хоргүй байх ёстой юм.
Манай компани 2004 оноос нүүрсийг коксжуулах, шахмал түлш хийх чиглэлээр ажиллаж байгаа. Хагас коксын анхны үйлдвэрийг 2010 онд Дархан хотод байгуулсан. Гэвч 2014 онд Багануурын хүрэн нүүрсийг шигшиж, гэр хорооллын иргэдэд тарааснаар шахмал түлшний үйлдвэрлэл бүрэн зогссон.
Манай Монгол Улсын нүүрсэн ба хагас коксон шахмал түлшний стандарт бол зохиомол учраас олон улсын шаардлагад нийцэхгүйг итгэл төгс хэлмээр байна.
Харин биошахмал түлш нь бүх шаардлагыг хангаж байгаа. Иймээс агаар орчны бохирдлыг бууруулах богино арга хэмжээнд хэрэгтэй гэж үзэж байгаа. Энэ төрлийн түлшийг Европ даяараа хэрэглэж байна. Мөн сав баглаа бодлын илүү зардал гаргадаггүй.
Саяхан мэдээлэл харахад "Тавантолгой түлш" компани зөвхөн сав баглаа боодолд гэхэд 83 тэрбум төгрөгийг зарцуулсан байна.
Биошахмал түлшний давуу тал нь
- зөөж тээвэрлэхэд хялбар
- шаталтын үед тоосонцор үүсэхгүй
- асалт хурдан, бүрэн шаталттай" гэлээ.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
