Гэрэл зургийг MPA агентлагийн онцгой зөвшөөрөлтэйгөөр ашиглав

Албан үүргээ гүйцэтгэж явсан цагдаагийн алба хаагчийг тээврийн хэрэгслээр мөргөж, зугтаасан асуудлаар Цагдаагийн Ерөнхий Газар (ЦЕГ)-аас мэдээлэл хийж байна. 

Энэхүү зөрчилтэй холбоотой мэдээллийг Цагдаагийн хошууч С.Баярбилэг дараах байдлаар хүргэлээ. 

Тэрбээр хэлэхдээ "Нэгдүгээр сарын 27-ны өдөр үүргээ гүйцэтгэж байсан цагдаагийн алба хаагчийг тээврийн хэрэгслээр мөргөж, улмаар зугтаасан бичлэг олон нийтийн цахим сүлжээнд нийтлэгдсэн.

Тээврийн цагдаагийн алба хаагч батлагдсан хуваарийн дагуу Чингэлтэй дүүргийн нутаг дэвсгэр Тасганы овоо орчимд 16:50 цагийн орчимд үүрэг гүйцэтгэж ажиллаж байсан.

Тухайн орчинд хөдөлгөөний нягтрал ихтэй байсан учраас алба хаагч хяналт тавьж ажиллах явцад Тoyota Harrier загварын тээврийн хэрэгсэл замын хөдөлгөөний үргэлжилсэн цагаан шугам давж эргэх явцад очиж шаардлага тавьсан байдаг.

Гэвч жолооч Г нь алба хаагчийн шаардлагыг үл биелүүлэн, улмаар тээврийн хэрэгслээрээ мөргөж, зугтаасан.

Тухайн тээврийн хэрэгслийн жолоочийг эрэн сурвалжлах ажиллагааны явцад Сүхбаатар дүүргийн 14 дүгээр хорооны нутаг дэвсгэрт байрлах зочид буудалд байхад нь олж тогтоосон.

Тээврийн хэрэгслийн жолоочоос согтуурлын зэрэг хэмжигч багажаар үлээлгэхэд 2.96 хувийн согтолттой гарсан.

Түүний автомашиныг Баянзүрх дүүргийн нутаг дэвсгэр Дарь эх орчимд байрлах орон сууцны хорооллын дунд үлдээсэн байсныг олж, одоогоор саатуулах хашаанд түр байрлуулсан байна" гэв. 

"Хуулийн дагуу торгох, зорчих эрх хязгаарлах, зургаан сараас гурван жил хүртэл хорих ял оноох зүйл ангитай" 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Үргэлжлүүлэн "Мөргүүлсэн алба хаагч эмнэлгийн тусламж авсан. Одоогоор биед учруулсан хохирлыг тогтоохоор шалгалтын ажиллагаа үргэлжилж байна.

Цагдаагийн алба хаагчийн биед хохирол учруулсан асуудал Эрүүгийн хуулийн 23.1 буюу хууль сахиулагчийг эсэргүүцэх зүйл ангиар шалгалтын ажиллагааг явуулдаг. Шалгалтын явцад асуудлын сэдэл санаанаас шалтгаалан хэргийн зүйлчлэл өөрчлөгдөж болно.

Цагдаагийн алба хаагчийн хууль ёсны шаардлагыг эсэргүүцэж, бие эрх чөлөөнд нь халдсан асуудал өмнөх онд нэлээд бүртгэгдсэн. Тоо баримтыг нягталж хэлэх нь зүйтэй байх.

Үүргээ гүйцэтгэж яваа цагдаагийн алба хаагчийн хууль ёсны шаардлагыг биелүүлэх үүрэгтэй гэдгийг хэлэхийг хүсэж байна" гэлээ. 

Энэ үеэр сэтгүүлчийн асуултад дараах хариултыг Цагдаагийн хошууч С.Баярбилэг нэмж хэлэв. 

-Урьд өмнө гарсан ийм асуудалд ямар хариуцлага хүлээлгэж байсан бэ?

-Цагдаагийн алба хаагчийн хууль ёсны шаардлагыг эсэргүүцсэн үйлдэлд холбогдох хуулийн дагуу арга хэмжээг тооцож ажилласан.

Торгох, зорчих эрхийг хязгаарлах, зургаан сараас гурван жил хүртэл хорих ялтай зүйл ангиуд байна. Тухайн асуудлуудад шүүхээр шийдвэр гараад явсан.