Баруун болон төвийн аймгуудын ихэнх нутгаар цасан бүрхүүл тогтоод байна

Өнөө өглөөний цаг уурын станц, харуулын цасны зузааны мэдээгээр баруун болон төвийн аймгуудын ихэнх нутаг, говийн болон зүүн аймгуудын нутгийн зарим газраар 0.0-23.0 см цасан бүрхүүл тогтоод байгаа аж. 

Хамгийн их нь Баянхонгорын Гурванбулагт 23.0 см, Увсын Улаангом, Хяргас, Малчин, Завханы Баянхайрханд 15.0 см, Баянхонгорын Жаргалант, Сэлэнгийн Хүдэрт 14.0 см, бусад хэсгээр 0.0-13.0 см зузаан цасан бүрхүүл тогтсон байна. 

Өнгөрсөн шөнө Увс нуурын хотгор, Монгол-Алтайн уулархаг нутаг, Завхан голын эх, Идэр, Тэс, Байдраг голын хөндийгөөр хамгийн хүйтэн буюу -37…-42 градус хоносон байна. 

Их Нуурууд болон Дархадын хотгор, Хангай, Хөвсгөлийн уулархаг нутаг, Хүрэнбэлчир орчим, Эг-Үүр, Орхон, Сэлэнгэ, Хараа, Ерөө, Туул, Тэрэлж голын хөндийгөөр -29…-35 градус, говийн бүс нутгийн өмнөд хэсэг, Дорнод-Дарьгангын тал нутгаар -17…-23 градус, бусад хэсгээр -24…-29 градус хүйтэн хоножээ.