Л.Оюун-Эрдэнэ: Том төслүүдийн гацсан шалтгааны нэг нь геополитикийн нөхцөл байдал, тусгай албадын шууд болон шууд бус нөлөөлөл

Гэрэл зургийг MPA агентлагийн онцгой зөвшөөрөлтэйгөөр ашиглав

УИХ-ын чуулганы нэгдсэн хуралдаанаар Монгол Улсын Засгийн газар, Бүгд Найрамдах Хятад Ард Улсын Засгийн газар хооронд Гашуунсухайт-Ганцмодны боомтын хил дамнасан төмөр замын бүтээн байгуулалтыг хэрэгжүүлэх тухай хэлэлцээрийг байгуулахад баримтлах чиглэл батлах тухай УИХ-ын тогтоолын төслийг хэлэлцэж байна. 

Уг тогтоолын төслийн талаар Ерөнхий сайд Л.Оюун-Эрдэнэ чуулганы нэгдсэн хуралдаанд танилцуулав. 

Тэрбээр Засгийн газрын 2024-2028 оны үйл ажиллагааны хөтөлбөрт тусгасан 14 мега төслийн нэг болох Гашуунсухайт-Ганцмод боомтын хил дамнасан төмөр замын бүтээн байгуулалтын 16 жил гацсан шалтгаан болон цаашдын үр өгөөжийн талаар үг хэлэв. Түүний хэлсэн үгнээс төмөр замын бүтээн байгуулалт зэрэг томоохон төслүүдийн гацсан шалтгааныг онцлон хүргэж байна.

Ерөнхий сайд Л.Оюун-Эрдэнэ "Хөгжлийн мега төслүүд гацсан суурь шалтгаанууд:

• Нэгдүгээрт, олон улсын геополитик нөхцөл байдал, тусгай албадын шууд болон шууд бус нөлөөлөл байна гэж үзсэн.  
• Хоёрдугаарт, эдийн засгийн төслүүдэд эрх ашгаа шингээхийг хүссэн улс төр болон эрх ашгийн хил дамнасан бүлэглэл, хувь улс төрчид,  
• Гуравдугаарт, дээрх нөлөөллөөс үүдэлтэй их хэмжээний санхүүжилттэй улс төрийн зорилтод акц юм.

Эдгээр гурван нөлөөллийг УИХ, Засгийн газар даахгүй явсаар ирсэн нь гашуун үнэн юм. Ерөнхий сайд, Засгийн газрын гишүүд, ажлын хэсэгт орсон төрийн албан хаагчдын аюулгүй байдалд заналхийлэл учирсан олон баримт байгааг дурдах нь зүйтэй. Сонгуулийн холимог тогтолцоо, түүнээс бүрдсэн хамтарсан Засгийн газар ийм нөхцөл байдлыг даван гарч, улс орныхоо хөгжлийн түүхийг эхлүүлж чадсаныг дэлхийн улс орнуудын түүх нотолдог. Олон нийт ч ийм хүлээлттэй байна" гэлээ.