Ж.Болд-Эрдэнэ: Угааж баяжуулсан нүүрс буюу мидлингийг барьцалдуулагчтай хольсноор таван үе шатыг дамжиж шахмал түлш болдог

“Тавантолгой түлш” ХХК-ийн үйлдвэрлэж байгаа шахмал түлш найрлагын хувьд 95 хувь нь угааж баяжуулсан нүүрс буюу мидлинг, үлдсэн 5 хувь нь барьцалдуулагч эдээс бүрддэг. “Энержи Ресурс” ХХК-аас гаргаж буй үндсэн түүхий эд болох мидлингийг бутлаад, барьцалдуулагчтай хольж, чийгийг тохируулж, шахаж хэвлэх, савлах гэсэн энгийн таван үйлдлээр үйлдвэрлэл явуулдаг байна.

Энэ талаар Зүүн үйлдвэрийн ахлах технологич Ж.Болд-Эрдэнэ "Тавантолгой түлш компани шахмал түлшний үндсэн түүхий эдэд мидлингийг хэрэглэж байгаа.

“Энержи Ресурс” компанийн Ухаахудгийн уурхайд угааж баяжуулсан нүүрс буюу мидлингийг ашигладаг. Технологийн процессын хувьд мидлингийг 95%, барьцалдуулагчийг 5%-аар тохируулж, шахмал түлшийг үйлдвэрлэдэг.

Манай үйлдвэрийн технологийн шугам буюу хоёрдугаар цехэд таван үе шатыг дамжиж эцсийн бүтээгдэхүүн гардаг. Ингэхдээ үндсэн түүхий эдээ бутлах, холих, холихдоо барьцалдуулагчийг 5%-аар тохируулах, хэвлэх, хатаах, савлах үе шаттай юм.

Мидлинг нь шигшүүр, бутлуур дамжлагаар ордог бөгөөд 5мм-ийн хэмжээтэй бутлагдахад 5%-ийн барьцалдуулагчаа нэмснээр холих төхөөрөмжид шилждэг. Дөрвөн шатны холих төхөөрөмжөөр дамжсаны дараа хэвд оруулж, шахаж гаргадаг. Үүний дараа шахмал түлшийг 6%-аас бага чийгтэйгээр хатааж, савладаг" гэж танилцуулав.

Сүүлийн үеийн 60 худаг бүхий босоо хатаах төхөөрөмжийг ашиглаж, шахмал түлшээ халуун агаараар хатаадаг байна.