Гэрэл зургийг MPA агентлагийн онцгой зөвшөөрөлтэйгөөр ашиглав

Олон улсын хүний эрхийн өдрийг тохиолдуулан "Нэг хүүхэд, Нэг цэцэг" хөдөлгөөнийг маргааш Сүхбаатарын талбайд зохион байгуулах талаар эрх зүйч Д.Мягмардорж мэдээллээ. 

Хүүхдийн эрх ба хүчингийн гэмт хэрэг үйлдсэн этгээдүүдэд ял чангатгах асуудлын талаар тэрбээр дараах байр суурийг илэрхийлэв. 

Энэ талаар "Хүчиндэх гэмт хэрэг үйлдсэн этгээдүүдэд манай улсын хууль маш сул үйлчилж байна.

Гэмт хэрэг үйлдсэн бусармаг этгээдүүд хууль завшиж байгаа учраас Эрүүгийн хуулийн хүчиндэх гэмт хэрэгтэй холбоотой ялыг чангатгах шаардлагатай. 

2023 оны аравдугаар сарын 3-нд ямар аймшигтай үйл явдал болсныг монголчууд мартаагүй байх хэмээн найдаж байна. 12 хон настай бяцхан охиныг хүчиндэж, хэрцгийгээр амь насыг нь хөнөөсөн гэмт хэрэг гарсан байдаг. 

Гэтэл энэ төрлийн гэмт хэрэгт дөрвөн төрлөөр хууль хэрэгжиж байна. 

1. Хорих
2. Торгох
3. Зорчих эрх хязгаарлах
4. Нийтэд тустай ажил хийлгэх

"Бэлгийн хүчирхийлэл үйлдэж буй хүмүүсийн ихэнх нь торгууль төлөөд салсан байна"

Гэвч гэмт хэрэг үйлдсэн 53 хүний 32 нь ял шийтгүүлжээ. Үүнийг задалж харвал 32 хүний 25 нь "торгох ял" авсан байна. Харин долоон хүн хорих ял авчээ.

Бэлгийн хүчирхийлэл үйлдэж буй хүмүүсийн ихэнх нь торгууль төлөөд салсан байна гэсэн үг. Харин долоохон хүн хорих ял авчээ. Мөн 12 хүний зорчих эрхийг хязгаарласан байна" гэлээ. 

"Хуулийг илүү чангатгаж, давхар соён гэгээрүүлэх ажил хийж нийтэд таниулах нь чухал"

Үргэлжлүүлэн "Хохирсон хүүхдүүд сэтгэл санаа, бие махбод, аж амьдралаараа маш хүнд түвшинд очдог. Тийм учраас холбогдох хуулийг илүү чангатгаж, давхар соён гэгээрүүлэх ажил хийж нийтэд таниулах нь чухал. 

Энэ төрлийн гэмт хэргийг бууруулах зорилгын хүрээнд Эрүүгийн хуулийн 12.5, 12.1-ийг чангатгая. Маргааш бид Сүхбаатарын талбайд Монголын мянга мянган хүүхдийн төлөө цэцгээ бариад өглөө 08:00 цагаас эхлэн тайван жагсана" гэлээ. 

"13 хан настай охин хойд эцгийнхээ хүчирхийлэлд өртөж, жирэмсэлсэн тохиолдол бий"

 

Гэрэл зургийг MPA агентлагийн онцгой зөвшөөрөлтэйгөөр ашиглав

Иргэн н.Майцэцэг "Хүүхдүүдийн төлөө энэ хөдөлгөөнийг эхлүүлж байгаа нь олон шалтгаантай. 

Нэг харамсалтай тохиолдлыг энд дурдахад Баянзүрх дүүргийн асрамжийн газар 13 настай жирэмсэн охин ирж байна. Үүний цаана хойд эцэг нь байжээ.

Хүүхэд өөрийгөө хамгаалах чадваргүйгээс жирэмсэн болж, үр хөндөлт хийлгэж байгаа юм. Тэр 13 настай хүүхдийн сэтгэл зүй үнэхээр маш хүнд байдалд орж байна. 

Хэдийгээр 24, 72 цаг улсын хамгаалалтад байлаа ч гэсэн дараа нь гэртээ очно. Иймэрхүү тохиолдол маш их байгаа учраас хуулиа чангатгахаас гадна хүмүүсийн ёс зүйг өөрчилж, хүүхэд шүү гэж харах өнцгийг нь сургалтаар сайжруулмаар байна" гэлээ. 

 

Гэрэл зургийг MPA агентлагийн онцгой зөвшөөрөлтэйгөөр ашиглав

Хүүхдийн тусламжийн 108 үйлчилгээний төвд ирсэн бэлгийн хүчирхийллийн дуудлага мэдээлэл сүүлийн 14 жилийн байдлаар:

• 2014 онд 46
• 2015 онд 130
• 2016 онд 166
• 2017 онд 238
• 2018 онд 425
• 2019 онд 277
• 2020 онд 254
• 2021 онд 403
• 2022 онд 392
• 2023 онд 420
• 2024 оны эхний найман сарын байдлаар 337 дуудлага мэдээлэл иржээ. 

Энэ төрлийн гэмт хэрэгтэй холбогдуулан хариу арга хэмжээ авсан тоо:

• 2017 онд 195 хүүхэд
• 2018 онд 310 хүүхэд
• 2019 онд 190 хүүхэд
• 2020 онд 213 хүүхэд
• 2021 онд 345 хүүхэд
• 2022 онд 369 хүүхэд
• 2023 онд 452 хүүхэд
• 2024 оны хагас жилийн байдлаар 198 хүүхэд

Бэлгийн хүчирхийлэлд өртсөн хохирогч хүүхдүүдэд хамгаалах нөхөн сэргээх үйлчилгээг үзүүлсэн гэх мэдээллийг Хүүхэд, гэр бүлийн хөгжил хамгааллын ерөнхий газраас ирүүлсэн. 

"Хүн амынхаа өсөлтөд чухал нөлөөг үзүүлэх охид эмэгтэйчүүд, хүүхдүүдээ хохироомооргүй байна"

Энэ талаар эрх зүйч Д.Мягмардорж "Хүчингийн гэмт хэрэг нууц хэлбэртэй байдаг учраас гэмт хэргийн хохирогч ч хэргээ нуудаг, гэмт хэрэг үйлдсэн хүн ч хэргээ нуудаг.

Манай монголчууд цөөхөн шүү дээ. Дөрвөн сая хүрэхгүй хүн амтай. Гэтэл хүн амынхаа өсөлтөд маш чухал нөлөөг үзүүлэх охид эмэгтэйчүүд, хүүхдүүдээ хохироомооргүй байна. Хуулийн заалтаа хатуу чанга байлгаасай гэж чин сэтгэлээсээ хүсэж байгаа юм" хэмээх байр суурийг илэрхийллээ.