Ойрын хоногуудад нийт нутгаар хүйтэн салхитай байх тул мэдрэгдэх температур илүү хүйтэн байна

Гэрэл зургийг MPA агентлагийн онцгой зөвшөөрөлтэйгөөр ашиглав

Ойрын хоногуудад нийт нутгаар хүйтэн салхитай байх тул хүнд илүү хүйтэн температур мэдрэгдэх талаар Цаг уур, орчны шинжилгээний газраас мэдээллээ. 

Бидний өдөр тутам цаг агаарын мэдээнд хүлээж авч буй температур нь агаарын температур бөгөөд энэ нь тухайн температур хүний биед хэрхэн мэдрэгдэх вэ гэдгийг шууд илэрхийлдэггүй. Тухайн температурыг хэрхэн мэдрэх нь агаарын урсгал буюу салхины хурд, чийгшлээс хамаардаг. Үүнийг хүнд “мэдрэгдэх температур” гэдэг. Хүйтэн, сэрүүний улиралд салхины хурд их байвал “мэдрэгдэх температур” нь тухайн агаарын температураас илүү хүйтэн мэдрэгддэг байна. 

Тухайлбал өнөөдөр өглөөний 10:00 цагийн байдлаар Улаанбаатар хотод -16 градус хүйтэн, салхины хурд 2 м/с байгаа тул мэдрэгдэх температур -21 градус байна. 

 

Хөлдөлт болон осголтоос урьдчилан сэргийлэх энгийн дүрэм: 

• Хүйтний улиралд спиртийн төрлийн зүйл битгий уу, захын судас тэлснээс биеийн дулаанаа их хэмжээгээр алдаад зогсохгүй хүйтний хэмийг буруу тооцно.
• Хүйтэнд тамхи битгий тат, тамхи захын цусны эргэлтийг багасгадаг.
• Сул чөлөөтэй хувцасла, байцаа шиг хувцасла, ингэснээр агаарын давхарга үүсэж дулааныг сайн хадгалдаг.
• Хүйтэнд төмөр, алт, мөнгөн гоёл зүүх хэрэггүй
• Хүйтэнд удаан хугацаагаар явахаа мэдэж байгаа бол биеэ тосолж байх хэрэгтэй
• Хүүхдүүд тоглоомдоо улайраад осгох, хөлдчих нь бий. Иймд тэднийг 15-20 минут тутамд дулаацуулж байх хэрэгтэй
• Хамгийн сүүлд цаг агаарын мэдээгээ тогтмол сонсож, ажлаа төлөвлөн, амьдрал ахуйдаа хэрэглэж сурах юм.