СУДАЛГАА: 12-оос дээш насныхан өдөрт 32 минутыг боловсролд, гурван цаг зургаан минутыг чөлөөт цагтаа зориулдаг

Гэрэл зургийг MPA агентлагийн онцгой зөвшөөрөлтэйгөөр ашиглав

2023 оны байдлаар улсын дунджаар 12 ба түүнээс дээш насны хүн амын долоо хоногийн нэг өдрийн цаг ашиглалтын дүр зургийг Үндэсний Статистикийн Хороо(ҮСХ)-ноос тоймлон танилцуулав.

Тодруулбал өдөрт 12 цаг 15 минутыг унтах, хооллох, хувийн ариун цэвэр, эрүүл ахуйг сахих гэх мэт зайлшгүй хувийн хэрэгцээнд, 4 цаг 36 минутыг хөлстэй хөдөлмөр эрхлэхэд, 3 цаг 31 минутыг хөлсгүй хөдөлмөр эрхлэхэд, 32 минутыг боловсролын үйл ажиллагаанд зарцуулж, үлдсэн 3 цаг 6 минут нь чөлөөт цагт зориулагдаж байна.

Чөлөөт цаг гэдэгт урлаг спортын үйл ажиллагаа, хүмүүстэй харилцах, олон нийтийн арга хэмжээнд оролцох зэрэг нь хамаарч байгаа юм. Үүнийг насны ангиллаар нь авч үзвэл

Өдөрт дунджаар

• 12-17 насныхан 227 минутыг 
• 18-24 насныхан 155 минутыг
• 25-39 насныхан 132 минутыг
• 40-59 насныхан 165 минутыг
• 60 ба түүнээс дээш насныхан 298 минутыг чөлөөт цагтаа зарцуулж байна. 

Түүнчлэн хөдөлмөр эрхэлдэг хүн долоо хоногийн нэг өдөрт дунджаар 7 цаг 42 минутыг хөлстэй хөдөлмөрт зарцуулж буй бөгөөд хүйсээр нь харвал эрэгтэйчүүд 8 цаг 14 минут, эмэгтэйчүүд 7 цаг 5 минутыг хөлстэй хөдөлмөр зарцуулж байна. Харин хөлсгүй хөдөлмөрт хөдөлмөр эрхэлдэг эрэгтэйчүүд 1 цаг 55 минут, эмэгтэйчүүд 3 цаг 39 минут зарцуулж байна.

Мөн хөдөлмөр эрхэлдэг хүн долоо хоногийн нэг өдөрт ажилдаа явах, зорчихдоо дунджаар 51 минут зарцуулж байгааг “Цаг ашиглалтын судалгаа”-нд дурдсан хэмээн ҮСХ-ноос мэдээллээ.