Ө.Шижир: Орос манайд хоёр дахь удаагаа бага оврын атомын цахилгаан станц барьж өгнө гэж амлаж байна. Энэ худал шүү
УИХ-ын чуулганы хуралдаанаар Цөмийн энергийн тухай хуульд өөрчлөлт оруулах тухай хуулийн төслийн анхны хэлэлцүүлгийг хийж байна. Хэлэлцэж буй асуудалтай холбогдуулан гишүүд асуулт асууж, хариулт авав.
УИХ-ын гишүүн Ө.Шижир: Цөмийн энергийн тухай хуулийн өөрчлөлтийг дэмжиж байгаа. 2011 оноос 2070 он хүртэл ураны салбарын өсөлт үргэлжлэх юм билээ. Тиймээс бид энэ алтан үеийн ашиглах ёстой. Ингэхдээ өмнөх алдаагаа давтахгүй байх нь чухал.
Өмнө нь 2009 онд Хан ресурс гэдэг компанитай холбоотой алдааг давтахгүй байх баталгаа бий юу. Тухайн үед ОХУ-ын талаас Д.Медведевийг Монголд айлчлахаас нэг сарын өмнө Канадын компанийн эзэмшиж байгаа ураны лицензийг цуцлаад Монгол-Оросын хамтарсан компанид өгснөөр улс төрийн асуудал үүссэн.
Оросын тал хоёр дахь удаагаа манайд бага оврын атомын цахилгаан станц барьж өгнө гэж амлаж байна. 2007 онд ярьсан эхний амлалтдаа хүрээгүй.
Сая Ерөнхийлөгчийг Франц улсад айлчилснаас долоо хоногийн дараа ирж амласан. Энэ амлалт худал шүү. Тиймээс бид гурав дахь хөрштэйгөө том төсөл хэрэгжүүлэх шаардлагатай. Хан ресурс компанид лиценз олгочихоод цуцалсан үүний дүнд манай улс 70 сая ам.доллар төлсөн.
Хуулийн төслийн ажлын хэсгийн ахлагч Б.Пүрэвдорж: Хан ресурс дээр хайгуулын хоёр лиценз, хөрөнгө оруулалтын гэрээ хийгээгүй байсан. Тухайн үеийн Засгийн газар лицензийг нь цуцлаад, Мардайг орост өгөх тухай ярьсан. Өнөөдөр ч Мардайг оростой хамтарч эзэмших асуудал хүчтэй яригдаж байгаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
