ЭМГЭНЭЛ: Лувсанчоймболын Мөнхсаруул (1956-2024)
ЛУВСАНЧОЙМБОЛЫН МӨНХСАРУУЛ
(1956-2024)
Бидний хайрт аав Лувсанчоймболын Мөнхсаруул 2024 оны 11 дүгээр сарын 3-ны өдөр 69 насандаа зуурдаар таалал төгсөж, бидэнд нөхөж баршгүй хүнд гарз тохиолоо.
Аав маань хань, үр хүүхэд, ач, зээ нарынхаа бат тулгуур нь байж, биднийгээ ямагт ирээдүйн сайн сайханд чиглүүлж, гэгээн тэмүүллээр хөтлөн замчлагч эрхэм хүмүүн байв. Аав маань 1956 онд Улаанбаатар хотод төрж, Нийслэлийн 6 дугаар дунд сургууль, Политехникийн Дээд сургуулийг Барилгын инженерээр, ЗХУ-ын Эрхүү хотын Политехникийн дээд сургуулийг Уул уурхайн маркшейдэр мэргэжлээр тус тус суралцаж төгссөн.
Ажил хөдөлмөрийн гараагаа 1974 онд “Монгол” телевизийн Хүүхэлдэйн киноны редакцад туслах редактор, зураачаар эхлүүлж, Эрчим хүчний яамны Зургийн институтэд Зураг төслийн мэргэжилтэн, мөн Дулааны III цахилгаан станцад ажиллан, үнэнч шударгаар хөдөлмөрлөж, улс орныхоо хөгжил дэвшил, бүтээн байгуулалтад гар бие оролцож байв. Аав маань хүнд тусархаг, олонд нийтэч, найз нөхдөдөө элбэрэлтэй, гэр бүлдээ энэрэлтэй байж, үр хүүхэд бидэндээ хүн байхын утга учрыг өөрөөрөө үлгэрлэн сургадаг байлаа.
Аавын минь ажилч хичээнгүй, хүнлэг нөхөрсөг, эгэл даруу, элэгсэг дотно, гэгээн гэрэлт дүр төрх нь бидний сэтгэлд үүрд хоногшин үлдэх болно.
Ум сайн амгалан болтугай
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглахдаа эх сурвалжаа (ikon.mn) заавал дурдах ёстойг анхаарна уу!
