Умард Солонгосын 3,000 цэрэг ОХУ-д ирээд байгааг АНУ-ын албаны эх сурвалжууд батлав

Энэ сарын эхээр Умард Солонгосын 3,000 орчим цэрэг Оросын Алс Дорнодын бүс нутагт ирснийг АНУ-ын ерөнхийлөгчийн албан ёсны эх сурвалж өчигдөр баталжээ.

“Эдгээр цэргүүд аравдугаар сарын эхнээс дунд үе хүртэл хугацаанд Умард Солонгосын Вонсан орчмоос Оросын Владивосток боомт руу усан онгоцоор очсон гэж бид үзэж байна. Дараа нь тэднийг Оросын Алс Дорнодын хэд хэдэн газарт тараан байрлуулсан ба одоогоор бэлтгэл сургуулилалтад хамрагдаж байгаа. Эдгээр цэргүүд Оросын армитай мөр зэрэгцэн тулаанд оролцох эсэхийг бид хараахан хэлж мэдэхгүй байна. Гэхдээ ингэх маш өндөр магадлалтай юм. Бэлтгэл сургуулилалт дууссаны дараа тэднийг Оросын баруун хэсэгт аваачиж, дараа нь Украины эсрэг тулалдаанд оролцуулах магадлалтай” гэж Цагаан ордны үндэсний аюулгүй байдлын зөвлөх Жон Кирби өчигдөр сэтгүүлчидтэй уулзахдаа хэлсэн байна.

Одоо Умард Солонгосын цэргүүдийг гурван газарт байрлуулж, Оросын армийн зэвсэг техник, тулааны арга барилтай танилцуулж, дадлагажуулах сургалт зохион байгуулж байгааг тэр бас нэмж мэдээлжээ.

Умард Солонгосын эхний ээлжийн 1,500 цэрэг Оросын Алс Дорнодод очоод байгаа, нийтдээ 10,000 гаруй цэрэг илгээхээр Пёняны дэглэм шийдвэрлэснийг Өмнөд Солонгосын үндэсний тагнуулын алба энэ долоо хоногийн эхээр мэдээлж байлаа.

Кирби бас Орос, Умард Солонгосын хамтын ажиллагаа НҮБ-ын аюулгүй байдлын хэд хэдэн тогтоолыг зөрчиж байгаа тул нэмэлт хориг арга хэмжээ авах нь тодорхой болсныг хэлжээ.

Мөн Умард Солонгосын цэргүүд Украины дайнд оролцвол их хэмжээний хохирол амсах боломжтойг анхааруулсан байна.

“Хэрвээ тэд Украины эсрэг тулалдах бол зүй ёсны бай болох болно. Украины арми Оросын цэргүүдээс өөрийгөө хамгаалж байгаатай адилаар Умард Солонгосын цэргүүдээс бас өөрийгөө хамгаалах болно. Тиймээс Украины эсрэг тулалдвал Умард Солонгосын цэргүүд алагдаж, шархдах нь гарцаагүй” гэж Кирби мэдэгджээ.

Өчигдөр Ром хотод Пентагоны тэргүүн Ллойд Остин сэтгүүлчидтэй уулзахдаа Умард Солонгосын цэргүүд ОХУ-д байгааг нотлох баримт АНУ-д байгааг мэдэгдсэн юм.

“Бидэнд Умард Солонгосын цэргүүд ОХУ-д очсоныг батлах баримт байгаа. Манай шинжээчид үүнийг үргэлжлүүлэн судалж байна. Одоо тэдний юу хийж байгааг харах л үлдлээ. Энэ бол бидний цэгцлэх ёстой асуудал мөн” гэж Остин хэлжээ.

Өмнөд Солонгосын тагнуулын мэдээлэл цацагдсаны дараа ОХУ-ын гадаад хэргийн яам үүнийг эрс няцааж байсан юм.

Тухайлбал гадаад хэргийн яамны хэвлэлийн төлөөлөгч Мария Захарова үүнийг “хуурамч мэдээлэл” гэж няцаагаад Украины дайнд оролцвол ноцтой үр дагавар амсахыг Сөүлийн эрх баригчдад анхааруулж байв.

Хэрвээ Умард Солонгосын цэргүүд Оросын эзлэн түрэмгийлэх дайнд оролцвол Украинд үзүүлэх тусламжаа нэмэгдүүлэх, тэр дундаа зэр зэвсэг нийлүүлж болзошгүй талаар Өмнөд Солонгосын ерөнхийлөгчийн алба өмнө нь мэдэгдсэн юм.

“Украины хямралд оролцвол ямар үр дагавар амсаж болох талаар тэд бодох хэрэгтэй. Хэрвээ манай улсын иргэдэд аюул тулгарвал Оросын Холбооны Улс хатуу хариу арга хэмжээг авах болно” гэж Захарова мэдэгджээ.

Өчигдөр бас ОХУ-д ирсэн Умард Солонгосын цэргүүдийн шинэ дүрс бичлэгийг Оросын Астра мэдээллийн суваг нийтэд үзүүлсэн байна.

Эх сурвалж: Yonhap News