Израил улс Ираны газрын тосны байгууламжуудад довтлох гэж байгааг АНУ-ын ерөнхийлөгч Байден мэдээллээ

Израил улс Ираны газрын тосны байгууламжуудад довтлохоор бэлдэж, энэ асуудлаар АНУ-ын засаг захиргаа Израилийн талтай хэлэлцэж байгаа тухай ерөнхийлөгч Жо Байден өчигдөр сэтгүүлчидтэй уулзахдаа мэдээлжээ.

Ийм цохилтыг АНУ зөвшөөрөх эсэхийг асуухад Байден “Бид яг энэ талаар одоо ярилцаж байна” гэж хариулсан байна.

Цагаан ордноос гарч явахдаа хальт хэлсэн түүний энэ үг тэр даруй Брент ангиллын түүхий газрын тосны үнийг 5 хувиар өсгөжээ.

Мягмар гарагт Иран улс Израилийн нутаг дэвсгэрт 180 гаруй баллистик пуужингаар довтолсноос хойш уг түүхий эдийн үнэ ханш нийтдээ 10 орчим хувиар өсөөд байна.

Уг халдлагынхаа хариуд Иран улс “өндөр үнэ төлөх”-ийг Израилийн ерөнхий сайд Бенжамин Нетаньяху анхааруулаад байгаа.

Ираны агаарын довтолгоо Израилд ямар хохирол учруулсан талаар мэдээлэл хомс байгаа ч цохилтын нэг бай болох Неватим агаарын баазад хохирол учирсан нь хиймэл дагуулаас авсан зургаас тодорхой болсон юм.

Ираны эрх баригчид энэхүү агаарын цохилтоо Хамасын улс төрийн бодлогын тэргүүн Исмаил Хания, Хезболлагийн удирдагч Хассан Насралла, Ираны хувьсгалт гвардын командлагч, бригадын генерал Аббас Нилфорушан нарын аллагын хариу арга хэмжээ гэж тайлбарлаж байгаа.

Байден өмнөх мэдэгдэлдээ Ираны цөмийн байгууламжуудад Израил улс довтлохыг АНУ зөвшөөрөхгүйг анхааруулж байсан юм.

Израилийн хэд хэдэн эх сурвалж ийм боломжийн талаар ярьсны дараа Байден дээрх анхааруулгыг өгч байлаа.

Тухайлбал Израилийн ерөнхий сайд асан Нафтали Беннет хэлэхдээ Ираны цөмийн байгууламжуудыг устгавал “Ойрх Дорнодын нүүр царайг өөрчилж, Тегераны террорист дэглэмийг үхэлд хүргэх болно” гэж байжээ.

Харин өчигдөр Израилийн хэвлэлүүд тус улс эхлээд Ираны газрын тосны байгууламжуудад довтолж, хэрвээ хариу үйлдэл үзүүлбэл цөмийн байгууламжуудад нь довтлох хувилбар яригдаж буй талаар албаны эх сурвалжаас уламжлан мэдээлсэн байна.

Лхагва гарагт ерөнхийлөгч Байден мэдэгдэхдээ Их Долоогийн бүлгийн удирдагчид “Израил улс хариу арга хэмжээ авах эрхтэй. Гэхдээ энэ нь пропорционал буюу ижил тэнцүү цар хүрээтэй байх ёстой” гэдэг дээр санал нийлснийг дуулгасан юм.

Хэрвээ Израилийн тал Ираны газрын тосны байгууламжуудад довтолбол энэ нь дэлхийн зах зээлд хүчтэй нөлөө үзүүлэхээр байна.

Учир нь Иран улс дэлхийн долоо дахь том газрын тос үйлдвэрлэгч юм. Бас үүний улмаас дэлхийн газрын тос тээвэрлэлтийн гуравны нэг, шингэрүүлсэн хийн тээвэрлэлтийн тавны нэг дамжин өнгөрдөг Ормузын хоолой хаагдаж болзошгүй байна.

Эх сурвалж: BBC