• 11 сарын 24, Ням
|
Уншиж байна ...
ХУУЧИРСАН МЭДЭЭ: 2024/09/04-НД НИЙТЛЭГДСЭН

"Цахим залилангийн хохирогч болсон бол Кибер гэмт хэрэгтэй тэмцэх газарт бүртгүүлж, хөрөнгийн шилжилтийг хязгаарлах боломжтой"

Э.Тэмүүлэн, iKon.mn
2024 оны 9 сарын 4
IKON.MN
Зураг зураг
Гэрэл зургийг MPA агентлагийн онцгой зөвшөөрөлтэйгөөр ашиглав

Эрүүгийн цагдаагийн алба болон Мөрдөн байцаах алба хамтран "Хянамгай байя" аяныг улсын хэмжээнд зохион байгуулах талаар мэдээлэл хийв.

Энэ үеэр цахим залилангийн улмаас хохирч буй иргэдийн ашиг сонирхол, гарч явсан мөнгийг хэрхэн царцаах талаарх мэдээллийг Эрүүгийн Цагдаагийн албаны Кибер гэмт хэрэгтэй тэмцэх газрын Шуурхай ажиллагааны хэлтсийн эрүүгийн мөрдөгч, цагдаагийн ахлах дэслэгч Б.Болортуяа өглөө.

Тэрбээр "Манай улс 3.6 сая орчим иргэнтэй. Тэдний 90 орчим хувь нь цахим хэрэглээнд нэвтэрсэн. Үүнийг дагаад сүүлийн үед цахим залилангийн гэмт хэрэг их бүртгэгдэж байна.

Цахим мөрийтэй тоглоомын гэмт хэрэгт олон оролцогч байгаа мэт боловч үүний цаана нэг хүн зохион байгуулалттайгаар иргэдийн мөнгийг залилж байдаг. Мөн таны гэр бүл, найз нөхөд дунд утас, таблетад их цаг хугацаа зарцуулж байвал юунд илүү цаг гаргаж байгааг нь хянаж байх хэрэгтэй. Түүнчлэн хувийн мэдээллээ бусдад өгч, дансаа ашиглуулснаар тухайн гэмт хэргийн оролцогч болж буйг анхаарах хэрэгтэй.

Мөрийтэй тоглоом зохион байгуулдаг хүмүүс түрээсийн орон сууц, зочид буудлын өрөө хөлсөлж гэмт хэргээ үйлддэг тул хэнд орон байраа түрээслүүлж буйг нягтлах шаардлага байна.

Цахим орчинд мөрийтэй тоглоом зохион байгуулсан этгээдийг зөрчлийн тухай хуулийн дагуу 100,000 төгрөгөөр торгох эсхүл ашигласан төхөөрөмжийг нь улсын орлого болгох арга хэмжээ авдаг.

Түүнчлэн цахим залилангийн хохирогч болохоос урьдчилан сэргийлэхийн тулд facebook ашиглаж найзуудаас нь мөнгө зээлэх зурвас ирвэл өөрөө мөн эсэхийг лавлаж асуух шаардлагатай. Мөн telegram, wechat, viber зэрэг цахим аппликэйшн ашиглаж танд ажиллах таатай нөхцөлийг санал болгох, ажлын байранд урих, бараа бүтээгдэхүүн сурталчлах замаар урьдчилгаа төлбөр шаардах, хувийн мэдээллээ бусдад өгснөөр цахим залилангийн хохирогч болох эрсдэлтэй. Илэрхий хуурамч буюу гадаад хүний нэр зураг ашигласан хаягтай харилцахдаа сонор сэрэмжтэй байхыг анхааруулж байна. 
Цахим гэмт хэргийн хохирогч болсон тохиолдолд цагдаагийн байгууллагын тусгай дугаар болох 102-т дуудлага өгч, тухайн хэргийг бүртгүүлэх шаардлагатай. Дуудлага мэдээллийг бүртгэж авснаар Кибер гэмт хэрэгтэй тэмцэх албаны Шуурхай ажиллагааны хэлтэстэй холбогдож хөрөнгийн шилжилт хөдөлгөөнийг хойшлуулах, хязгаарлах боломжтой. Үүгээр ч зогсохгүй харьяа дүүргийнхээ цагдаагийн байгууллагад өөрийн биеэр очиж өргөдөл, гомдол гаргах, мөрдөн шалгах ажиллагаа явуулж буй мөрдөгчдөд бүртгүүлснээр прокурорын байгууллагын зөвшөөрлөөр хохирсон мөнгийг буцаан төлүүлэх боломж бий. 
Сүүлийн үед Telegram ашиглаж иргэдэд даалгавар биелүүлэх, янз бүрийн ажлын санал тавих зурвас их ирж байна. Ингэснээр хувийн мэдээллээ бусдад алдах, цахим залилангийн хохирогч болох эрсдэлтэйг анхаараарай" гэв.